تعلیم کے ساتھ طلبہ والدین اور اساتذہ کے ادب و احترام کو کبھی نظر انداز نہ کریں ۔ ظفیر کرخی
معیاری تعلیم کے حصول کو مقصد بنا کر مطالعہ پابندی کے ساتھ کریں۔
سنت کبیر نگر (رپورٹ ظفیر علی کرخی /محمد رضوان ندوی): سمریاوان بلاک کے ایم این۔ پبلک اسکول اور اودھ گرلز انٹر کالج کڑ جا میں بروز اتوار ائی ائی ٹی ،جے ای ای اور نیٹ کے بچوں کی کونسلنگ کی گئی۔ اس دوران بچوں کو مقابلہ جاتی امتحان میں شاندار کارکردگی کا مظاہرہ کرنے کے لیے ضروری ہدایات دی گئیں۔ علاقہ میں واقع اسکو لوں کے تین سو سے زائد بچوں نے کیریئر کونسلنگ میں حصہ لیا۔ تعلیم کی بدلتی ہوئی سطح کے پیش نظر بچوں کو اپ ڈیٹ رہنے کی ہدایت دی گئی۔ بچوں نے انسٹرکٹر سے سوالا ت کر معلومات حاصل کیں۔
اس کاؤنسلنگ میں محمد نبی پبلک اسکول سنورا غوسی ، شان سینٹرل اکیڈمی دودھارا اور عبدالکلام پروگریسیو انٹر مہواری سمیت دیگر اسکولوں کے 300 بچوں نے شرکت کی۔ کیریئر کونسلنگ میں، تمل ناڈو کے کوئمبٹور میں مشہور کوچنگ سینٹر سری چیتنیا کے فزکس کے استاد زبیر احمد خان نے بچوں کو نئے تعلیمی نظام کے بارے میں معلومات فراہم کیں۔ انہوں نے کہا کہ آج ملک میں تعلیمی معیار بہت تیزی سے بدل رہا ہے۔ تمام طلباء اور اساتذہ کو تعلیم کے اس بدلتے ہوئے معیار کے ساتھ اپ ڈیٹ رہنا ہوگا۔ انہوں نے کہا کہ ملک بھر میں 24 لاکھ بچے NEET کی تیاری کرتے ہیں اور تقریباً 12 لاکھ بچے JEE امتحان کی تیاری کرتے ہیں۔ ان امتحان میں جنوبی ہند کے بچے ہمارے علاقے کے بچوں سے آگے ہیں۔ انہوں نے کہا کہ جنوبی ہند کے بچے چھٹی کلاس سے ہی تیاری شروع کر دیتے ہیں۔ اس علاقے کے اساتذہ اور بچے بدلتے ہوئے تعلیمی نظام سے خود کو اپ ڈیٹ کرتے رہتے ہیں۔ مقابلہ جاتی امتحان میں شاندار کارکردگی کا مظاہرہ کرنے کے لیے، بچوں کو کلاس 6 کے بعد سے جدید نصاب کو لاگو کرکے تیاری کرنے کی ضرورت ہے۔
اس دوران اے ایچ ایگی انٹر کالج دودھارا کے استاد قمر عالم صدیقی نے بچوں سے کہا کہ وہ زندگی کا مقصد طے کریں۔ مقصد بڑا ہونا چاہیے۔ مقصد کے حصول کے لیے راستے میں آنے والی مشکلات کا سامنا کرتے ہوئے آگے بڑھیں۔
اس کے علاوہ پرائمری ٹیچر ایسو سی ایشن کے ضلع نائب صدر ظفیر علی کرخی نے کہا کہ دیہی علاقوں میں ٹیلنٹ کی کوئی کمی نہیں ہے۔ بچوں میں موجود ٹیلنٹ کو دیکھنے اور اس میں نکھار لانے کی ضرورت ہے۔ اس خطے کے بچے پچھلے کئی سالوں سے مقابلہ جاتی ٹیسٹ میں شاندار کارکردگی کا مظاہرہ کر رہے ہیں۔انھونے کہا کہ والدین اپنے بچوں سے بہت امیدیں وابستہ کیے رہتے ہیں۔ پڑھائی میں خوب محنت کریں۔والدین اور اساتذہ کا ادب احترام لازمی طور پر کریں۔کامیابی آپ کا قدم چومے گی۔
اس دوران پرنسپل محمد سلیم ہاشمی، اودھ گرلز انٹر کالج کے پرنسپل جمال احمد، محمد شفیق، محمد سلمان، اسرار احمد، افکار احمد، مہندر کمار، شہباز، مولانا سعید احمد، رمیش کمار، حبیب الرحمن وغیرہ اساتذہ موجود رہے.
طلبہ 16 گھنٹے کریں مطالعہ:
کیریئر کونسلنگ کے دوران انسٹرکٹر محمد زبیر خان نے بتایا کہ IIT-JEE، NEET کا نصاب بہت مشکل ہے۔ یہ کورس دو سال میں مکمل نہیں کیا جا سکتا۔ اس میں اچھی کامیابی حاصل کرنے کے لیے چھٹی جماعت سے تیاری کرنے کی ضرورت ہے۔ اس کے علاوہ بچوں کو کم از کم 14-16 گھنٹے خود مطالعہ کرنے کا مشورہ دیا۔ اس نصاب کی ماہانہ تقسیم کر کے تدریسی کام کریں۔
بڑے خواب دیکھیں اور اسے پورا کرنے کی کوشش کریں:
قمر عالم صدیقی نے بچوں کی حوصلہ افزائی کرتے ہوئے کہا کہ وہ خود کو جانیں اور اپنی صلاحیتوں کا صحیح استعمال کریں۔ بڑے خواب دیکھیں۔ خواب کی تعبیر کو پورا کر نے میں جتنی بھی مشکلات پیش آئیں منزل کی طرف بڑھتے رہیں۔ اپنے مقصد کے حصول میں مشکلات کو دور کرنے کے لیے اپنے اساتذہ اور والدین اور دوسروں سے مدد لیں۔ اپنے خوابوں کو سچ ثابت کرنے کے لیے کبھی بھی منفی خیالات نہ رکھیں۔ مثبت سوچ کے ساتھ آگے بڑھتے رہیں۔
