امام حسینؓ اور کربلا : غیرمسلم شعراء کے اشعار کے آئینے میں

محمدیوسف رحیم بیدری، بیدر، کرناٹک۔

حضرت امام حسین ؓ کی شہادت اور سانحۂ کربلا انسانی تاریخ کا ایک اہم واقعہ ہے جس سے متاثر ہونے اور اس کو یاد رکھنے والوں میں مسلمان شعراء کے ساتھ ساتھ غیرمسلم شعراء بھی شامل ہیں۔ انھوں نے سانحہ ء کرب وبلا اور نواسہ ء رسول ﷺ حضرت امام حسینؓ کی شہادت کو پڑھ کرجو کچھ سوچا اور سمجھا، وہ انھوں نے اپنے اشعارمیں قلمبند کررکھا ہے۔ ایک تحقیق کے مطابق مرثیہ لکھنے والوں میں مُنشی پریم چند، کالی داس گپتا رضا، سوامی پرشاد اصغر،رام راؤ سیوا، راجہ بلون سنگھ راجہ،منشی چنّو لال دلگیر (گھبرائے گی زینب)، تکِّا رام، راجہ مہرا، شری مکھن داس، بالاجی تسامبا رک تارا، لال رام پرشاد وغیرہ کے نام سامنے آئے ہیں۔
علامہ طالب جوھری نے اپنے سوشیل میڈیا پیج پرلکھا ہے کہ ’’کچھ برہمنوں کا ماننا ہے کہ جب انہیں یزید اور حسین کے درمیان وقوع پذیر ہونے والی جنگ کی خبر ملی تو برہمنوں کی ایک تعداد نے ہندوستان سے عراقی سرزمین کی جانب کوچ کیا تاکہ امام حسین علیہ السلام کی مدد کرسکیں۔ جب یہ لوگ سرزمین عراق میں پہونچے تو کربلا کا جانگداز واقعہ رونما ہو چکا تھا اور حضرت امام حسین علیہ السلام اور ان کے جانثار ساتھی اپنی جانیں نثار کرکے جام شہادت نوش کرچکے تھے۔ یہ برہمنگی گروہ خون امام حسین علیہ السلام کا بدلہ لینے کیلئے کوفہ میں مختار کے سپاہیوں سے ملحق ہوگیا اور سبھی لوگ مختار ثقفی کے ساتھ شامل جنگ ہوکر درجہ ء شہادت پر فائز ہوگئے۔ اس کے بعد سے ان برہمنوں کے پسماندگان نے حضرت امام حسین علیہ السلام کی یاد میں عزاداری شروع کردی اور خود کو حسینی برہمن کا نام دیا۔ محرم کے دنوں میں یہ حسینی برہمن مخصوص انداز میں مجالس و ماتم اور نوحہ و مرثیہ کا اہتمام کرتے ہیں اور ہندی، سنسکرت، پنجابی اردو اور کشمیری وغیرہ میں نوحہ و مرثیہ کے اشعار قلمبند کرتے ہیں‘‘
زوار قمر عابدی کے مطابق ’’پریم چند کا مشہور ڈرامہ ’’کربلا’’حق و باطل سے پردہ اٹھاتا ہے۔ اسی طرح اردو ادب میں ایسے ہندو شاعروں کی تعداد کچھ کم نہیں جنہوں نے اپنی معرکتہ الآرا منظوم تخلیقات میں معرکہ کربلا میں انسانیت کے اعلیٰ کرداروں کی خوشہ چینی کی ہے۔ ایسے قابل ذکرشعرا بیجاپور کے راماراؤ، مکھی داس، منشی چھنو لال دلگیر، راجہ بلوان سنگھ، لالہ رام پرشادبشر، دیا کشن ریحان، راجہ الفت رائے،کنور دھنپت رائے، کھنولال زار، دلورام کوثری، نانک لکھنوی، منی لال جوان، روپ کماری، یوگیندرپال صابرجوش ملیشانی، منشی گوپی ناتھ امن، چکبست، باوا کرشن مغموم، کنور مہندر سنگھ بیدی سحر، کرشن بہاری، ڈاکٹر دھرمیندر ناتھ، ماتھرلکھنوی، مہیندرسنگھ اشک، بانگیش تیواری، گلزار دہلوی، بھون امروہوی وغیرہ کا کلام امام حسین علیہ السلام سے ان کی غیرمعمولی عقیدتوں کا مظہر ہے‘‘ٹائمزآف انڈیا (21؍جنوری 2008؁ء) کے مطابق راجستھان ، پنجاب اور مدھیہ پردیش میں حسینی برہمنوں کاخاندان آباد ہے جن کاسرنیم دت ہواکرتاہے۔ ان کے راہیب د ت نامی کسی بزرگ نے اپنے بیٹوں کے ساتھ 10؍اکتوبر 680؁ء کو کربلا میں حسینی فوج کے ساتھ مل کر یزیدیوں کے خلاف جنگ کی تھی۔ یہ لوگ آج بھی ماتم کرتے ہیں اور نذرونیاز مانتے ہیں۔
صفدرہمدانی کے بموجب ’’حسینی برہمن دردنا چاریہ کی نسل سے تھے۔ ان میں خودداری، بہادری، او رہمت کوٹ کوٹ کر بھری تھی۔ کہا جاتا ہے کہ کربلا میں حسین کی شہادت کی خبر سنی تو حسینی برہمن 700عیسوی میں عراق پہنچے اور امام حسین کا بدلہ لے کر واپس آئے۔ یاد رہے کہ کربلا کا واقعہ 680عیسوی میں ہوا تھا‘‘یہ موضوع مزید تحقیق کامتقاضی ہے کہ کون سے غیرمسلم شعراء ایسے رہے جنہوں نے مرثیہ، اورنوحہ لکھا اور خصوصاً حضرت امام حسین ؓ کی شہادت پر ان کے کون سے جذبات تھے جس کو انھوں نے منظوم کرتے ہوئے اپنے عاشق امام ہونے کاثبو ت دِیا۔ اس تعلق سے بے رخی تونہیں البتہ بے نیازی ضرور دیکھنے کوملی ہے۔ بے نیازی ایک حدتک ضروری ہے لیکن اس بے نیازی کو لاپروائی کاشکار نہیں ہوناچاہیے ۔
ہم یہاں 34ہندوشعرا ء کا وہ چیدہ چیدہ کلام پیش کرنے کی سعی کررہے ہیں جو امام حسین ؓ اور کربلا سے متعلق ہے ۔ اردو زبان کے اُن ہندوشعرا کے نام درج ذیل ہیں۔ ۱۔ روپ کماری ، ۲۔ پنڈت دیاشنکر نسیم ، ۳۔ جے سنگھ ، ۴۔ سورج سنگھ سورجؔ،۵۔ دلو رام کوثریؔ، ۶۔حکیم چھنو مل دہلوی، ۷۔ کنور مہندر سنگھ بیدی، ۸۔ ادب سیتا پوری، ۹۔گوپی ناتھ امن لکھنوی، ۱۰۔ حکم تر لوک ناتھ اعظمؔ جلال آبادی، ۱۱۔ گرسرن لال ادیبؔ لکھنوی، ۱۲۔ رام پرکاش ساحر ، ۱۳۔ رائے بہادر بابو اتاردین، ۱۴۔ پنڈت ایسری پرشاد دہلوی ، ۱۵۔ سرکشن پرشاد ، ۱۶۔ منشی لچھمن داس ، ۱۷۔ منشی چنو لال (دلگیر) ، ۱۸۔ رگھبیر سرن دواکر المعروف راہیؔ امروہوی ، ۱۹۔سنت درشن جی مہاراج درشنؔ ،۲۰۔ سروجنی نائیڈو،۲۱۔ رانا بھگوان داس،۲۲۔ پرتپال سنگھ بیتاب ؔ، ۲۳۔امر سنگھ جوشؔ، ۲۴۔ چرن سنگھ چرن ؔ، ۲۵۔ سردار جسونت سنگھ راز چونتروی ، ۲۶۔ ڈاکٹر امر جیت ساگر، ۲۷۔ سردار ترلوک سنگھ سیتل،۲۸۔ ہر چرن سنگھ مہر ؔ، ۲۹۔ گوپی ناتھ امن لکھنوی مرحوم ، ۳۰۔ منشی دیشو پرشاد ماتھر لکھنوی ، ۳۱۔سردار جسونت سنگھ راز چونتروی، ۳۲۔ پروفیسر ستنام سنگھ خمار ؔ
خواتین پہلے کی مناسبت سے سب سے پہلے روپ کماری کاکلام ملاحظہ فرمائیں ؎

برنگ گل داغ حبِ حیدر ہمارے سینے میں ہے نمایاں
یہ پھول رکھا ہے ہم نے دل میں بتوں سے نظریں بچا بچا کر

بے دین ہوں، بے پیر ہوں
ہندو ہوں، قاتل شبیرّ نہیں

حسین ؓ اگر بھارت میں اُتارا جاتا
یوں چاند محمد ؐکا، نہ دھوکے میں مارا جاتا

نہ بازو قلم ہوتے، نہ پانی بند ہوتا
گنگا کے کنارے غازی کا علم ہوتا

ہم پوجا کرتے اُس کی صبح و شام
ہندو بھاشا میں وہ بھگوان پکارا جاتا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پانچ انگلیوں میں یہ حرف زن ہے
یعنی یہ مطیع پنجتن ہے
پنڈت دیا شنکر نسیم
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جے سنگھ پناہ مانگے گی مجھ سے نرگ کی آگ
ہندو تو ہوں مگر ہوں میں شیدا حسینؓ کا
جے سنگھ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ معجزہ بھی پیاس جہاں کو دکھا گئی
آنکھوں میں آنسوئوں کی سبیلیں لگا گئی
کرب و بلا میں دیکھیے شبیرؑ کی ’’نہیں‘‘
ہر دور کے یزید کو جڑسے مٹا گئی
سورج سنگھ سورج
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قرآن اور حسین برابر ہیں شان میں
دونوں کا رتبہ ایک ہے دونوں جہان میں
قرآں کلامِ پاک ہے شبیر نور ہے
دونوں جہاں میں دونوں کا یکساں ظہور ہے
حضرت شبیر ؓ دین ِ مصطفیٰ کے نام پر
صبح سے تاعصر بچوں کو فدا کرتے رہے
معرفت کہتے ہیں اس کو بھوک اور غم میں حسینؑ
زیر ِ خنجر بھی نماز ِ حق ادا کرتے رہے
کوثری ؔ پھر قبر میں کیاہوتی ایذا جب کہ ہم
عمر بھر ذکرِ شہیدِ کربلا کرتے رہے
دلو رام کوثری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سلامی کیا کوئی بے کار ہے جی سے گزر جانا
حیاتِ جاوداں ہے شاہ کے ماتم میں مر جانا
نہیں آتا جنہیں راہِ حقیقت سے گزر جانا
حسین ابنِ علی ؓ سے سیکھ لیں وہ لوگ مر جانا
حکیم چھنو مل دہلوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گلشنِ صدق و صفا کا لالہء رنگیں حسینؓ
شمعِ عالم، مشعلِ دنیا، چراغِ دیں حسینؓ

بادہء ہستی کا ہستی سے تری ہے کیف و کم
اٹھ نہیں سکتا ترے آگے سرِ لوح و قلم
کنور مہندر سنگھ بیدی
چھڑک کے خون شہیدوں کا لالہ و گل پر
عطا کیے ہیں زمانے کو رنگ و بو تُو نے

جی کے مرنا تو سب کو آتا ہے
مر کے جینا سکھا دیا تُو نے

کنور مہندرسنگھ بیدی سحر ؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نظر نظر میں جو کعبے بنا دیئے تم نے
حسینؑ کونسے جلوے دکھا دیئے تم نے

چمک سے جن کی منورہے آج تک اسلام
چراغ ایسے بہتّر جلا دیئے تم نے

حسینؑ چشمِ عنایت ذرا ادب پر بھی
نہ جانے کتنے مقدر بنا دیئے تم نے
ادب سیتا پوری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
غمِ حسینؑ میں جو آنکھ تر نہیں ہوتی
اسے نصیب حقیقی نظر نہیں ہوتی

ہوئے نہ ہوتے جو شبیرؑ کربلا میں شہید
نظر زمانے کی اسلام پر نہیں ہوتی

غمِ حسینؑ نہ ہوتا جو امنؔ کے دل میں
غمِ زمانہ سے اس کو مفر نہیں ہوتی
گوپی ناتھ امنؔ لکھنوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اے کربلا ہے تیری زمین رشکِ کیمیا
تانبے کو خاک سے ہم زر بنائیں گے
اعظمؔ تُو اپنے شوق کو بے فائدہ نہ جان
فردوس میں یہ شعر تیرا گھر بنائیں گے
حکم تر لوک ناتھ اعظمؔ جلال آبادی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لوحِ جہاں پہ نقش ہے عظمت حسینؑ کی
حق کو شرف ملا ہے بدولت حسینؑ کی
ہوئی ہے تازہ دل میں رسولِؐ خدا کی یاد
کہتے تھے لوگ دیکھ کے صورت حسینؑ کی
تھا اعتقاد میرے بزرگوں کو بھی ادیبؔ
میراث میں ملی ہے محبت حسینؑ کی

گرسرن لال ادیبؔ لکھنوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہے حق و صداقت مرا مسلک ساحرؔ
ہندو بھی ہوں شبیرؑ کا شیدائی بھی
رام پرکاش ساحر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ دل ہو خاک نہ ہو جس میں اہل بیت ؑکا غم
وہ پھوٹے آنکھ جو روئی نہ ہو محرم میں
رائے بہادر بابو اتاردین
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نکلیں جو غمِ شہ میں وہ آنسو اچھے
برہم ہوں جو اس غم میں وہ آنسو اچھے
پنڈت ایسری پرشاد دہلوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حسین ابن علی ؑ ہیں فرد یکتا
کوئی مظلوم ایسا تھا نہ ہوگا
دیا سر آپ نے راہ خدا میں
کیا دین نبیؐ کو دین اپنا
جگر بند علی ؑ و فاطمہؑ ہے
رسول اللہ کا پیارا نواسا
کیا آل نبی ؐ کو قتل صد حیف
مسلمانو! کیا یہ ظلم کیسا؟
ولائے سبط پیغمبرؐ ہے نعمت
یہ نعمت ہو عطا ہر اک کو مولا
سرکشن پرشاد
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کم جس کی خیالیں ہوں‘ وہ تنویر نہیں ہوں
بدعت سے جو مٹ جائے وہ تصویر نہیں ہوں
پابند شریعت نہ سہی گو لچھمنؔ
ہندو ہوں مگر دشمن شبیرؑ نہیں ہوں
منشی لچھمنؔ داس
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اکبر ؑہے نہ قاسم ؑہے نہ عباس ؑدلاور
یہ میری رہائی تو ہے اب قید سے بد تر
منشی چنو لال (دلگیر)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
موقوف کچھ نہیں ہے انیسؔ و دبیرؔ پر
راہیؔ بھی کہہ رہا ہے ترا مرثیہ حسینؓ
میں حق پرست مبصر ہوں اس لیے شبیر!
تمہیں ہی فاتحِ عالم قرار دیتا ہوں
کاش پھر پیغام حق لے کر یہاں آئیں حسینؓ
زندگی کو اک نیا پیغام دے جائیں حسینؓ

رگھبیر سرن دواکرالمعروف راہیؔ امروہوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سنت درشن جی مہاراج درشنؔ نے اردو، فارسی، ہندی، پنجابی اور انگریزی میں شاعری کی ہے۔ انگریزی منظومات کے دو مجموعے شائع ہوچکے ہیں۔ انہوں نے کئی عالمی دورے کیے اور خدا شناسی، خودشناسی اور امنِ عالم کے مختلف پہلوؤں پر افکار پیش کیے۔ ان کے خطبات کا ترجمہ دنیا کی تقریباً چالیس زبانوں میں ہوچکا ہے۔ انہوں نے واقعہ کربلا کو مثالی قرار دیا۔ اپنی نظم ’’فاتح کربلا‘‘ میں کہتے ہیں:

حسینؓ درد کو، دل کو، دعا کو کہتے ہیں
حسینؓ اصل میں دینِ خدا کو کہتے ہیں
حسینؓ حوصلہ ء انقلاب دیتا ہے
حسینؓ شمع نہیں آفتاب دیتا ہے
حسینؓ لشکرِ باطل کا غم نہیں کرتا
حسینؓ عزم ہے ماتھے کو خم نہیں کرتا
حسینؓ سلسلہ ء جاوداں ہے رحمت کا
حسینؓ نقطہ ء معراج ہے رسالت کا
حسینؓ جذبہ ء آزادیء ہر آدم ہے
حسینؓ حریتِ زندگی کا پرچم ہے
حسینؓ صبحِ جہاں تاب کی علامت ہے
حسینؓ ہی کو بھلا دیں یہ کیا قیامت ہے
بروزِ حشر نشاطِ دوام بخشے گا
حسینؓ درشن ِ ؔتشنہ کو جام بخشے گا
سنت درشن جی مہاراج درشنؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سروجنی نائیڈو کو بلبلِ ہند کہاجاتاہے۔ وہ آج سے قریب98سال پہلے 1925؁ء کو کانگریس کی صدر بھی منتخب ہوئی تھیں۔ ان کی شاعری کاکلیات لندن سے شائع ہوچکا ہے۔ کہاجاتاہے کہ ان کی نظم ’’شبِ شہادتِ عظمیٰ‘‘ کا ترجمہ مولانا صفی لکھنوی نے کیا ہے ؎

برہنہ پا، سیاہ پوش، چشم سفید، اشکبار تیری
مصیبتوں پہ آہ، روتی ہے خلق زا ر زار
ہائے حسین ؓبے وطن، وائے حسینؓبے کفن
پیارے ولیِ حق نما، تیرے مُحب با صفا
جس کی نہیں کوئی مثال، گاڑ گیا وہ اک نشان
جد سے وراثتاً ملی، دولتِ دینِ بے زوال
سروجنی نائیڈو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاالٰہ کی سطوتِ شوکت کے حامل زندہ باد
قائدِ اربابِ حق جانِ قیادت زندہ باد
(رانا بھگوان داس)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اور غم زمانے کے دور دور رہتے ہیں
اک حسین ؑکا غم ہے جب سے مہرباں اپنا
جو شہیدوں نے لہو سینچا نہ ہوتا بے تاب
یہ جو اسلام کا گلشن ہے بیاباں ہوتا
پرتپال سنگھ بیتاب ؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ظالموں کے اتنے جھانسوں میں بھی تو آیا نہیں
دیکھ کر طاقت کو تیرا دل بھی گھبرایا نہیں
دولت ِ دنیا کے آگے صبر جھک پایا نہیں
زندگی ٹھکرائی تو نے عزم ٹھکرایا نہیں
دوسروں میں ایسی جرات کی فراوانی کہاں؟
سارے عالم میں بھلا تیری سی قربانی کہاں؟
امر سنگھ جوشؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لیا خیال کا جب تیرے آسرا میں نے
ہوا یقیں کہ منزل کو پا لیا میں نے
خدا کرے کہ مجھے خواب میں حسینؑ ملیں
تمام رات اندھیروں میں کی دعا میں نے
چرن سنگھ چرن ؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ یاد آتے ہی ہو جاتی ہیں آنکھیں اشکبار اب بھی
زمیں ہے مضمحل اب بھی،فضا ہے لالہ زار اب بھی
سردار جسونت سنگھ راز چونتروی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رواں ہے شام و سحر چشمِ درد سے ساگرؔ
غمِ حسین سے ہم بھی تو پیار کرتے ہیں
ڈاکٹر امر جیت ساگر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جنگ کے میداں کو جب سرور چلے
ہر طرف بھالے گڑے،خنجر چلے
دھوپ کے صحرا کا منظر الاماں
اوڑھ کر تطہیر کی چادر چلے
اف رے آلِ مصطفی ؐپر یہ ستم
بیڑیوں میں پھول سا عابدؑ چلے
سن کے سیتل ؔ کربلا کا سانحہ
سینکڑوں خنجر میرے دل پر چلے
سردار ترلوک سنگھ سیتل ؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حسینؑ تو نے راہِ حق میں جان دے دی
یہ وہ عمل ہے جو عالی وقار کرتے ہیں
کبھی نصیب ہو ہم کو بھی کربلا کی خاک
یہ وہ دعا ہے جسے بار بار کرتے ہیں
ہر چرن سنگھ مہر ؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حسین ابن علی کو سلام کرتا ہوں
کہ اس سے کسب فیوض دوام کرتا ہوں
نہیں ہے مصلحت اندیش اعتقاد مرا
پئے طہارت دل اہتمام کرتا ہوں

کچھ اور کلام ؎

حسینیت یزیدیت سے ہرگز دب نہیں سکتی
ہے ظاہر دین کا دنیا سے سودا ہو نہیں سکتا
حسینی شان کے سجدے ہیں سجدے میری نظروں میں
جبیں فرسائیوں کا نام سجدہ ہو نہیں سکتا
جو راہ حق میں سب کچھ پیش کرنے سے جھجھک جائے
وہ کوئی اور ہو حیدر کا بیٹا ہو نہیں سکتا
گوپی ناتھ امنؔ لکھنوی مرحوم
۔۔۔۔۔۔۔۔۔۔۔۔۔۔۔۔۔۔۔۔۔۔۔۔

برصغیر کے مشہور اور معروف ہندو شاعر جناب مرحوم ماتھر لکھنوی کا کلام‘‘جبین کائنات’’میں امام عالی مقام کی شان و معرفت بیان کی گئی ہے

انسانیت حسین ؑتیرے دم کے ساتھ ہے
ماتھرؔ بھی اے حسینؑ تیرے غم کے ساتھ ہے
مسلمانوں کا منشاء عقیدت اور ہی کچھ ہے
مگر سبطِ نبی ﷺسے میری نسبت اور ہی کچھ ہے
منشی دیشو پرشاد ماتھر لکھنوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ یاد آتے ہی ہو جاتی ہیں آنکھیں اشکبار اب بھی
زمیں ہے مضمحل اب بھی، فضا ہے لالہ زار اب بھی
سردار جسونت سنگھ راز چونتروی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آخر میں پروفیسر ستنام سنگھ خمار ؔکے اشعار ملاحظہ ہوں۔

لکھا ہے آسماں پہ فسانہ حسین ؓکا
سب کا حسینؑ، سارا زمانہ حسین ؓ کا

کوئی امام، کوئی پیمبر ،کوئی ولی
کتنا ہے سربلند گھرانہ حسینؓ کا

ہوگی کوئی تو بات کہ صدیوں کے بعد بھی
جس دل کو دیکھئے، ہے دیوانہ حسین ؓ کا

میں حر ہوں چاہیے مجھے تھوڑی سی نقشِ پا
کوئی مجھے بتا دے ٹھکانہ حسینؓ کا

آزادی خیال کی تحریک ہی تو ہے
عاشور کو چراغ بجھانا حسین ؑ کا

اب بھی زبانیں خشک ہیں پہرے فرات پر
دہرا رہا ہے خود کو زمانہ حسینؓ کا

کب سے چکا رہا ہوں قصیدوں میں اے خمارؔ
مجھ پر ہے کوئی قرض پرانا حسینؓ کا