بیدر۔ 2؍جنوری۔ (محمدیوسف رحیم بیدری): بیدر ڈسٹرکٹ ٹیبل ٹینس ایسوسی ایشن (BDTA) نے ضلع کے ٹیبل ٹینس ہال کے بنیادی ڈھانچے کی تزئین و آرائش کے لیے ٹیبل ٹینس ایسوسی ایشن کے ضلع صدر راج شیکھر جاولے اور سکریٹری ویریش ایس وڈی کی قیادت میں ڈسٹرکٹ یوتھ سروسز آفیسر (DYSO) کو ایک درخواست پیش کی ہے۔ٹیبل ٹینس میں بچوں اور نوجوانوں کی بڑھتی ہوئی شرکت کے تناظر میں، ایسوسی ایشن نے تربیت اور ٹورنامنٹ کو محفوظ اور پیشہ ورانہ انداز میں منعقد کرنے کے لیے ضروری سہولیات کی ضرورت پر زور دیا ہے۔ درخواست میں چوٹوں سے بچنے اور کھیل کے معیار کو بڑھانے کے لیے ہال میں ربڑ یا لکڑی کے کھیلوں کے فرش لگانے، پرانے اور خراب ٹیبل ٹینس ٹیبلز کی جگہ نئی ٹیبل لگانے اور کھلاڑیوں کی حفاظت اور کارکردگی کے لیے مناسب روشنی فراہم کرنے کا مطالبہ کیا ۔
ایسوسی ایشن نے ضلع یوتھ سروسز کے افسرسے درخواست کی ہے کہ وہ اس درخواست پر فوری غور کریں تاکہ بیدر ضلع کے کھلاڑیوں کو محفوظ اور معیاری سہولیات مل سکیں۔اس موقع پر ایسوسی ایشن کے عہدیداران اور ممبران موجود تھے۔
