بہرائچ(پریس ریلیز): 1022ویں عرس سلطان الشہداء فی الہند، حضرت سیدنا سالار مسعود غازی رحمۃ اللہ علیہ کے موقع پر دعوتِ اسلامی انڈیا کے مختلف علاقوں سے آئے ہوئے قافلوں نے عرس کی تقریبات میں بھرپور حصہ لیا۔ دعوتِ اسلامی انڈیا کے شعبہ GNRF کی جانب سے غریبوں میں کمبل تقسیم کیے گئے اور زائرین کی خدمت کے لیے مفت طبی کیمپ کا اہتمام کیا گیا۔
عرس کے موقع پر عوام کو دینِ حق کی تعلیمات سے روشناس کروانے کے لیے دینی کتب اور رسائل تقسیم کیے گئے۔ علمائے کرام کی خدمات کو سراہا گیا اور ان سے ملاقات کرکے خیریت دریافت کی گئی۔ مکتبۃ المدینہ سے شائع شدہ اسلامی کتب کا تعارف بھی حاضرین کے سامنے پیش کیا گیا، جسے عوام و خواص نے بے حد پسند کیا۔
درگاہ شریف انتظامیہ کمیٹی کے نو منتخب صدر، محترم جناب بقاؤ اللہ صاحب نے دعوتِ اسلامی کے اسٹال کا دورہ کیا۔ اس موقع پر گونڈہ ڈویژن کے نگران، جناب ابو طلحہ عطاری صاحب نے ان کا پرتپاک استقبال کرتے ہوئے گل پوشی کی اور انہیں مبارکباد پیش کی۔
درگاہ شریف مسجد کے امام، حضرت مولانا ارشد القادری صاحب نے دعوتِ اسلامی انڈیا کے ذمہ داران کو خصوصی دعاؤں سے نوازا۔ اس موقع پر درگاہ انتظامیہ کمیٹی کے معزز اراکین، دلشاد احمد ایڈووکیٹ اور وسیم احمد مکرانی بھی موجود تھے۔
یہ اطلاع مدرسۃ المدینہ فیضانِ صدیق اکبر، اعظم گڑھ کے پرنسپل، حضرت مولانا اقبال حسین مصباحی صاحب نے اپنے پریس ریلیز کے ذریعے دی۔
عرس کی یہ روحانی اور خدمتِ خلق پر مبنی تقریبات حضرت سیدنا سالار مسعود غازی رحمۃ اللہ علیہ سے والہانہ محبت اور ان کے مشن کی یادگار ہیں، جو دینِ حق کی ترویج و اشاعت اور انسانیت کی خدمت کا عملی نمونہ پیش کرتی ہیں۔
