رپورٹ: ایاز بستوی (ترجمان ایوان ادب)
کوسہ ممبرا(ممبئی): گزشتہ اتوار 7_جنوری ،2024 کو دینیات کلاسس یاسمین پارک قادر پیلس کوسہ ممبرا میں چھٹا مشاعرہ "ردیفی مشاعرہ”کے عنوان سے منعقد ہوا جس میں دو ردیفیں ("میں رنگ”)اور ("کا رنگ” )دی گئی تھیں اس پروگرام میں مقامی وبیرونی شعراء کرام نے حصہ لیا اور مشاعرہ بڑی کامیابی سے ہمکنار ہوا۔
اس شعری محفل کے صدر استاد شاعر اعجاز ہندی صاحب منتخب ہوئے اور نظامت کی ذمہ داری تابش رامپوری صاحب نے سنبھالی،مہمان اعزازی کی حیثیت پر تابش رامپوری صاحب کے استاد جناب خورشید عالم فائز ہوئے اور ان کی خدمت میں تابش رامپوری صاحب نے منظوم سپاسنامہ بھی پیش کیا جو کہ ایوان ادب کی روایت میں شامل ہے،اور مہمان خصوصی کے طور پر اندھیری ممبئی سے عمر فراہی صاحب اور ممبرا سے ہنگامہ اعظمی تشریف فرما تھے، روایت کے مطابق فخرعالم اعظمی صاحب نے اعجاز ہندی صاحب کی شال پوشی کی اور پھر ذوالفقار صعیدی نے مہمان خصوصی محترم عمر فراہی صاحب کی شال پوشی کی پھر مسیح الدین نذیری نے ممبرا کے بزرگ شاعر محترم ہنگامہ اعظمی کی شال پوشی کی اور شال پوشی کے بعد تابش رمپوری صاحب نے اپنے استاد محترم اور صاحب اعزاز خورشید عالم صاحب کو گرانقدر اورخوبصورت صدری پہنا کر اعزاز بخشا۔
یہ ردیفی مشاعرہ اپنے وجود میں بڑا ہی منفرد مشاعرہ رہا، ردیفی مشاعرے کی روایت جو ایک عرصہٴ دراز سے کالعدم سی ہوگئی تھی اسے اراکین ایوان ادب کے مشترکہ مشورے سے دوبارہ زندگی بخشی گئی ہے اور آئندہ اس روایت کی فضا کو مزید ہموار کرنے کے سلسلے میں حتی الامکان کوششیں جاری رہیں گی، بہرحال مشاعرے کی فضا کی تعمیم وتفہیم کے لئے شعرائے کرام کے نمائندہ اشعار پیش کئے جارہے ہیں:
تمام رنگوں میں شامل ہے شش جہات کا رنگ
کہ جیسے قوس قزح میں ہے کائنات کا رنگ
صاحب صدر. جناب اعجاز ہندی
۔۔۔۔۔۔۔۔۔۔۔۔۔۔۔۔
شاید اچھا لگ جائے
میر کو آج غزل کا رنگ
صاحب اعزاز . جناب خورشید عالم
۔۔۔۔۔۔۔۔۔۔۔۔۔۔۔۔
نیند پہلے تو کبھی اتنی بھی بیزار نہ تھی
پہلے اتنا تو کبھی بدلا نہ تھا رات کا رنگ
مہمان خصوصی . جناب عمر فراہی
۔۔۔۔۔۔۔۔۔۔۔۔۔۔۔۔
مشاعرے کی ہے تشہیر خط رومن میں
عجیب رنگ ہے انگریزی اشتہار کا رنگ
سلیم رشک
۔۔۔۔۔۔۔۔۔۔۔۔۔۔۔۔
یہ عشق ہے یہاں رنگوں کا اعتبار نہیں
یقیں نہ آئے تو خود دیکھ لو بلال کا رنگ
مسیح الدین نذیری
۔۔۔۔۔۔۔۔۔۔۔۔۔۔۔۔
عجیب رنگ ہے دیکھو خیال یار کا رنگ
دل ونگاہ میں رہتا ہے انتظار کا رنگ
ایاز بستوی
۔۔۔۔۔۔۔۔۔۔۔۔۔۔۔۔
یہ بات سچ ہے دعا رنگ وبو سے عاری ہے
مگر دعا سے نکھرتا ہے کائنات کا رنگ
مدیر اعلیٰ، ذوالفقار صعیدی
۔۔۔۔۔۔۔۔۔۔۔۔۔۔۔۔
کھلائیں خون پسینے کی روٹیاں ہم نے
ہمارے بچوں کے چہرے پہ ہے حلال کا رنگ
ہنر رسولپوری
۔۔۔۔۔۔۔۔۔۔۔۔۔۔۔۔
خواب سے پہلے نظر آنے لگا تعبیر کا رنگ
کتنا مانوس ہے دلبر تری تصویر کا رنگ
ناظم مشاعرہ . تابش رامپوری
۔۔۔۔۔۔۔۔۔۔۔۔۔۔۔۔
دریا کی وسعتوں میں افق کی کشاد میں
صحرا میں تیرا رنگ ہے، کوہ ودمن میں رنگ
مومن ہندی
۔۔۔۔۔۔۔۔۔۔۔۔۔۔۔۔
ذرے ذرے سے عیاں ہے ترے انوار کا رنگ
کل جہاں سے مرے مولی ترے شہکار کا رنگ
فخر عالم خان اعظمی
۔۔۔۔۔۔۔۔۔۔۔۔۔۔۔۔
ساغر و مینا, صراحی اور پیمانے کا رنگ
کیوں بدل ڈالا ہے ساقی تم نے میخانے کا رنگ
عارف عماد باندوی
۔۔۔۔۔۔۔۔۔۔۔۔۔۔۔۔
کیوں الجھتا ہے تو اندھیروں سے
دن بتائے گا کیا ہے رات کا رنگ
فیصل مارولوی
۔۔۔۔۔۔۔۔۔۔۔۔۔۔۔۔
میری رگ رگ میں ہے خلوص و وفا
دیکھ اسلاف کے شعار کا رنگ
توفیق فاخری
۔۔۔۔۔۔۔۔۔۔۔۔۔۔۔۔
پھر وہی بچوں سی ضد اور بے سبب بیجا سوال
پھر بڑھاپے میں نظر آنے لگا بچپن کا رنگ
رفیق چوگلے
۔۔۔۔۔۔۔۔۔۔۔۔۔۔۔۔
یہ میٹھی شہد سے اردو زبان ہے دیکھو!
اسے نہ دیجئے ہندو نہ مسلمان کا رنگ
مولانا اسماعیل قمر بستوی
۔۔۔۔۔۔۔۔۔۔۔۔۔۔۔۔
رنگینیاں زمانے کی اک ساتھ جب ہوئیں
آیا نئے وجود میں محبوبیت کا رنگ
ازہر اعظمی
۔۔۔۔۔۔۔۔۔۔۔۔۔۔۔۔
نکلا تھا آفتاب جو غار حرا سے کل
پھیلا ہوا ہے آج بھی اس کی ضیا کا رنگ
ضیاء الحق ضیا قنوجی
۔۔۔۔۔۔۔۔۔۔۔۔۔۔۔۔
تنگ دستی کا یہ موسم بھی عجب ہے موسم
بدلا بدلا نظر آتا ہے ہواوں کا رنگ
یاسر اعظمی
۔۔۔۔۔۔۔۔۔۔۔۔۔۔۔۔
ہر کسی کو پسند آئے گا
پاس جس کے ہے سادگی کا رنگ
ساحل بستوی
۔۔۔۔۔۔۔۔۔۔۔۔۔۔۔۔
کسی کو بھا گیا ہے آج جو کسی کا رنگ
اتار پھینکا ہے پھر اس نے بھی خودی کا رنگ
روح الله منعمی
۔۔۔۔۔۔۔۔۔۔۔۔۔۔۔۔
عشق اور جام کو الگ کرکے
بدلا موضوع گفتگو کا رنگ
ہر فن ساجد
اخیر میں مسیح الدین نذیری صاحب نے پروگرام کی نوعیت پر روشنی ڈالی اور تشریف لائے ہوئے شعرائے کرام اور مہمانان عظام کا شکریہ ادا کیا.
