بیدر۔ 5؍مئی (محمدیوسف رحیم بیدری): کرناٹک رکشنا ویدیکے 8؍ مئی کو شہر کے ڈپٹی کمشنر دفتر کے سامنے دھرنا دے گی تاکہ ضلع میں پرائیویٹ اسکولوں اور کالجوں کی جانب سے وصول کی جانے والی زیادہ فیسوں کے خلاف احتجاج کیا جاسکے، یہ بات ویدیکے کی ضلع یونٹ کے صدر سومناتھ پاٹل مدھول نے بتائی۔انھوں نے بتایاکہ دھرنا صبح 10 بجے سے شروع ہوگا۔ اس کے بعد ڈپٹی کمشنر کو ایک عرضی پیش کی جائے گی۔انہوں نے الزام لگایا کہ چونکہ پرائیویٹ تعلیمی ادارے بھاری فیسیں وصول کر رہے ہیں اس لیے بچوں کی پرائمری، سیکنڈری اور کالج کی تعلیم غریب والدین پر بوجھ ہے۔کچھ پرائیویٹ پری یونیورسٹی کالجز ٹریننگ کے نام پر ضلع کے طلباء سے ہزاروں روپے وصول کر رہے ہیں۔ اس لیے سرکاری کالجوں میں طلبہ کے داخلے کو یقینی بنانے کے لیے کارروائی کی جائے۔ انہوں نے مطالبہ کیا کہ اسکول اور کالج کی کم سے کم فیسیں مقرر کی جائیں تاکہ غریب اور متوسط طبقے کے طلباء ان کو برداشت کرسکیں۔
