✍️ وصی اللہ عبدالحکیم مدنی
____________
رمضان المبارک کے آخری عشرہ کی طاق راتوں میں ایک عظیم اور بابرکت رات آتی ہے جسے لیلة القدر کہا جاتا ہے۔ اس رات کی عبادت ہزار مہینوں یعنی تقریباً تراسی سال چار مہینوں کی عبادت سے بھی زیادہ افضل ہے۔
اللہ تعالیٰ کا ارشاد ہے:
لَيْلَةُ الْقَدْرِ خَيْرٌ مِّنْ أَلْفِ شَهْرٍ
“لیلة القدر ہزار مہینوں سے بہتر ہے۔”
(سورۃ القدر: 3)
نبی کریم ﷺ سے اس رات کے لیے کوئی مخصوص نماز یا عبادت متعین طور پر ثابت نہیں ہے، البتہ اس مبارک رات کو نماز، تلاوتِ قرآن، ذکر و اذکار، دعا اور توبہ و استغفار میں گزارنا مسنون اور مطلوب ہے۔
شب قدر کی مسنون دعا
عائشہ رضی اللہ عنہا بیان کرتی ہیں کہ میں نے عرض کیا:
يا رسول الله! أرأيت إن علمت أي ليلة ليلة القدر ما أقول فيها؟
“اے اللہ کے رسول! اگر مجھے معلوم ہو جائے کہ کون سی رات لیلة القدر ہے تو میں اس میں کیا دعا پڑھوں؟”
آپ ﷺ نے فرمایا:
اللَّهُمَّ إِنَّكَ عَفُوٌّ تُحِبُّ الْعَفْوَ فَاعْفُ عَنِّي
“اے اللہ! بے شک تو معاف کرنے والا ہے، تو معافی کو پسند کرتا ہے، پس مجھے معاف فرما دے۔”
یہ حدیث درج ذیل کتب میں مروی ہے:
سنن ترمذی (3513)
سنن ابن ماجہ (3850)
مسند احمد (42/236)
مستدرک حاکم (1/530)
اور امام ترمذی رحمہ اللہ نے اسے حسن صحیح قرار دیا ہے۔
دعا میں لفظ "كريم” کا اضافہ
سنن ترمذی کے بعض نسخوں اور دیگر کتابوں میں اس دعا میں لفظ "كريم” کا اضافہ ہے، جو حدیث کا حصہ نہیں ہے۔
چناں چہ شیخ البانی رحمہ اللہ نے اپنی کتاب سلسلة الأحاديث الصحيحة میں اس اضافے کے متعلق تنبیہ کرتے ہوئے کہا:
"سنن ترمذی میں”عفو” کے بعد "کریم” کا اضافہ ہے۔ پہلے بیان شدہ مصادر میں کہیں بھی اس کا ذکر نہیں ہے اور نہ ان مصادر سے روایات لینے والی کتابوں میں اس اضافے کا ذکر ہے، تو اس سے معلوم یہی ہوتا ہے کہ یہ قلمی نسخے لکھنے والے کاتب یا ناشر کی غلطی ہے۔ اس کی ایک وجہ یہ بھی ہے کہ یہ اضافہ سنن ترمذی کے ہندوستانی نسخے جس پر مبارک پوری رحمہ اللہ کی شرح تحفة الأحوذي ہے (4/264) اس میں بھی نہیں ہے اور نہ ہی کسی اور کتاب میں اس کا ذکر ہے۔
اس بات کی تائید اس چیز سے بھی ہوتی ہے کہ امام نسائی نے اس روایت کو امام ترمذی والی سند سے بھی ذکر کیا ہے اس سند میں دونوں اپنے استاد قتیبہ بن سعید سے بیان کرتے ہیں اور پھر نسائی میں یہ اضافہ موجود نہیں ہے۔
اس دعا میں مذکورہ اضافہ ہمارے فاضل بھائی علی حلبی کے رسالے میں 202 نمبر پر بھی ہے جو کہ "مهذب عمل اليوم والليلة لابن السني” کے نام سے موسوم ہے، حالاں کہ یہ اضافہ ابن سنی کی کتاب میں بھی نہیں ہے، اس کی وجہ یہ ہے کہ ابن سنی اپنے استاد نسائی سے بیان کرتے ہیں اور پہلے گزرا ہے کہ امام نسائی قتیبہ سے بیان کرتے ہیں، بیان کرنے کے بعد علی حلبی نے ترمذی وغیرہ کا بھی حوالہ دیا ہے، حالاں کہ فن تخریج کے مطابق ہونا یہ چاہیے تھا کہ اس اضافے کو [۔۔۔] اس طرح کی بریکٹ میں لکھا جاتا اور پھر کہا جاتا کہ یہ صرف ترمذی میں موجود ہے، جب کہ تحقیق کا مطلب اور تقاضا یہ ہے کہ اسے ذکر ہی نہ کیا جائے اور اگر بیان کرنا بھی ہے تو یہ بتلانے کے لیے کہ اس اضافے کی کوئی دلیل نہیں ہے۔” انتہی
"سلسلة الأحاديث الصحيحة” (13/ 140)
کچھ تحقیق کاروں نے سلسلہ صحیحہ میں البانی رحمہ اللہ کی اس گفتگو کو دیکھ کر یہ سمجھ لیا کہ البانی رحمہ اللہ کی جانب سے صحیح ترمذی میں ذکر کردہ تصحیح سے رجوع ہے۔
بہ ہر حال اسے رجوع سمجھیں یا پہلے فیصلے سے الگ اور مستقل تحقیق گردانیں، البانی رحمہ اللہ نے حق بات کہہ دی اور رونما ہونے والی غلطی کا تدارک کر لیا۔
اور ہو سکتا ہے کہ یہ اضافہ لوگوں کی زبان زد عام اس لیے ہوا کہ احادیث کی کچھ کتابوں میں یہ اضافہ مذکور ہے، لیکن ان میں یہ اضافہ حدیث کا حصہ نہیں ہے، مطلب یہ ہے کہ جن علمائے کرام نے یہ اضافہ ذکر کیا ہے اس کی وجہ یہ تھی کہ کچھ نسخوں میں”کریم” کا اضافہ موجود ہے، جیسے کہ مسند احمد کے محققین [مؤسسہ رسالہ] (42/ 236) میں کہتے ہیں: "نسخہ (ق) میں (عفوٌّ كريم) ہے”انتہی
(ق) سے قلمی نسخہ ہے، اس کی تفصیل کے لیے آپ مسند احمد کی تحقیق کا مقدمہ دیکھیں: (1/104)
یہی اضافہ المكتب الاسلامی کے طبعہ میں بھی موجود ہے، دیکھیں: (11/6118) حدیث نمبر: (26021) س کے محققین کہتے ہیں: نسخہ (ق) میں عفو کریم ہے، جب کہ متن میں مذکور الفاظ دیگر نسخوں میں موجود ہیں۔
*بعض علماء کی کتابوں میں اضافہ*
اس اضافے کو بہت سے علمائے کرام نے اپنی کتابوں میں ذکر کیا ہے: جیسے کہ ابن اثیر "جامع الأصول” (4/324) میں، عمرانی "البيان في المذهب الشافعي” (3/568) میں، خازن "لباب التأويل في معاني التنزيل” (4/ 452) میں، ابن قیم "بدائع الفوائد”(2/ 143) میں، خطیب شربینی "الإقناع في حل ألفاظ أبي شجاع” (1/ 247) میں، امیر صنعانی "التحبير لإيضاح معاني التيسير” (4/ 268) میں اور طحطاوی "حاشية على مراقي الفلاح شرح نور الإيضاح” (ص: 401) میں ذکر کیا ہے۔
ان سب مؤلفین نے "کریم” کا اضافہ بغیر سند کے ذکر کیا ہے اور کچھ نے اس کی نسبت سنن ترمذی کی جانب کی ہے اور یہ بھی اس وقت ہے جب ان کتابوں کے قلمی نسخے تیار کرتے وقت دقت نظر سے کام لیا گیا ہو۔
لیکن آج ہمیں اس بات میں کوئی شک نہیں ہے کہ یہ اضافہ حدیث کا حصہ نہیں ہے، کیوں کہ حدیث کی دسیوں مسند کتابیں اس اضافے کو ذکر نہیں کرتیں، ہم نے سنن ترمذی کے متعدد قلمی نسخوں پر تحقیق کے بعد منظر عام پر آنے والے طبع شدہ نسخے بھی دیکھے ہیں۔ ان میں سے کسی میں بھی اس اضافے کا ذکر نہیں ہے، مثلاً: ہم نے بشار عواد کی تحقیق سے چھپنے والا نسخہ دیکھا جس کے (5/490) میں یہ حدیث بغیر اضافے کے مذکور ہے، اسی طرح شعیب ارناؤط کی تحقیق سے شائع ہونے والا نسخہ بھی اس اضافے کے بغیر ہے، اس نسخے میں یہ حدیث (6/119) پر موجود ہے۔
واللہ اعلم بالصواب”
(ماخوذ:اسلام سوال وجواب)
خلاصہ کلام یہ ہے کہ
(1) "عفو” کے بعد لفظ "كريم” کا اضافہ سنت سے ثابت نہیں ہے اور جن مؤلفین نے اپنی کتابوں میں” كريم” کااضافہ کیا ہے، انھوں نے بغیر سند کے ذکر کیا ہے۔
(2) شیخ البانی کی صحيح ترمذی (3513) میں لفظ "کریم” ہے جسے سہو پر محمول کیاجائے گا۔
*اس دعا میں "عفو” کے لفظ کی حکمت*
علماء نے بیان کیا ہے کہ اس دعا میں "عفو” کا لفظ نہایت بلیغ اور جامع ہے۔
عفو کا معنی ہے:
گناہ کو مٹا دینا، معاف کرنا اور اس کے اثر کو بھی ختم کر دینا۔
اسی لیے امام ابن قیم رحمہ اللہ فرماتے ہیں:
العفو يتضمن محو الذنب وإزالته بالكلية
“عفو کا مفہوم یہ ہے کہ گناہ کو مکمل طور پر مٹا دیا جائے۔”
(بدائع الفوائد)
اسی وجہ سے لیلة القدر جیسی عظیم رات میں مغفرت اور عفو کی دعا سکھائی گئی ہے۔
لیلة القدر میں مغفرت کی دعا کی حکمت
علماء نے بیان کیا ہے کہ اس دعا کا انتخاب بڑی حکمت پر مبنی ہے:
1️⃣ لیلة القدر مغفرت کی رات ہے۔
نبی کریم ﷺ نے فرمایا:
من قام ليلة القدر إيمانًا واحتسابًا غفر له ما تقدم من ذنبه
“جو شخص ایمان اور ثواب کی نیت سے لیلة القدر میں قیام کرے اس کے پچھلے گناہ معاف کر دیے جاتے ہیں۔”
(صحیح بخاری: 1901، صحیح مسلم: 760)
2️⃣ اس رات میں گناہوں کی معافی کی امید سب سے زیادہ ہوتی ہے۔
3️⃣ اس لیے سب سے مناسب دعا عفو اور مغفرت کی دعا ہے۔
اسی وجہ سے نبی کریم ﷺ نے طویل دعاؤں کے بجائے مختصر مگر جامع دعا سکھائی۔
مزید علمی فوائد
فائدہ 1:
اس حدیث سے معلوم ہوتا ہے کہ صحابہ کرام عبادات کے بارے میں نبی ﷺ سے رہنمائی طلب کرتے تھے۔
فائدہ 2:
اس حدیث سے معلوم ہوتا ہے کہ مختصر مگر جامع دعا افضل ہوتی ہے۔
فائدہ 3:
اس حدیث سے معلوم ہوتا ہے کہ اللہ تعالیٰ کو معاف کرنا پسند ہے۔
فائدہ 4:
یہ دعا بندے کو عجز و انکساری اور اللہ کی رحمت کی امید سکھاتی ہے۔
فائدہ 5:
اس حدیث سے معلوم ہوتا ہے کہ لیلة القدر میں دعا کا خصوصی اہتمام کرنا چاہیے۔
حاصل کلام:
اس پوری تحقیق کا خلاصہ یہ ہے:
1️⃣ شب قدر کی مسنون دعا یہ ہے:
اللَّهُمَّ إِنَّكَ عَفُوٌّ تُحِبُّ الْعَفْوَ فَاعْفُ عَنِّي
2️⃣ "عفو” کے بعد لفظ "كريم” کا اضافہ صحیح حدیث سے ثابت نہیں ہے۔
3️⃣ بعض قلمی نسخوں کی وجہ سے یہ اضافہ بعض کتابوں میں آگیا۔
4️⃣ شیخ البانی رحمہ اللہ نے اسے کاتب یا ناشر کی غلطی قرار دیا ہے۔
5️⃣ لہٰذا مسنون دعا وہی ہے جو بغیر اضافے کے ثابت ہے۔
6️⃣۔جن مؤلفین نے اپنی کتابوں میں كريم” کااضافہ کیا ہے، انھوں نے بغیر سند کے ذکر کیا ہے۔
7️⃣ شیخ البانی کی صحيح ترمذی (3513) میں لفظ "کریم” ہے، جسے سہو پر محمول کیاجائے گا۔
