ممبئی میں روشنی کا پرچم

کچھ بات ہے کہ ہستی مٹتی نہیں ہماری

صدیوں رہا ہے دشمن دورِ جہاں ہمارا

ہندوستان کی سب سے بڑی خوبی اس کا تنوع اور مختلف مذاہب، زبانوں اور تہذیبوں سے مل کر تشکیل پانے والی مشترکہ وراثت ہے۔ یہاں صدیوں سے مختلف مذاہب کے ماننے والے ایک دوسرے کے ساتھ مل جل کر رہتے آئے ہیں۔ ایک دوسرے کی خوشیوں میں شریک ہونا اور مشکل وقت میں ایک دوسرے کے شانہ بشانہ کھڑے رہنا ہماری سماجی زندگی کا اہم حصہ رہا ہے۔ عید ہو یا دیوالی، ہولی ہو یا دسہرہ، گنیش چترتھی ہو یا نوراتری، ان تہواروں کی خوشیاں کسی ایک مذہب یا برادری تک محدود نہیں رہتیں بلکہ پورے معاشرے کو اپنی رنگینیوں میں شامل کرلیتی ہیں۔

شہروں کے بازاروں سے لے کر محلوں کی گلیوں تک یہ اپنائیت اور باہمی تعلق نمایاں طور پر دکھائی دیتا ہے۔ یہی ہندوستان کی گنگا جمنی تہذیب، یعنی میل جول اور مشترکہ طرزِ زندگی کی اصل پہچان ہے۔

دیوالی کے دنوں میں جنوبی ممبئی کا پورا علاقہ روشنیوں اور خوشیوں سے جگمگا اٹھتا تھا۔ گجراتی اور جین برادری کے لوگ بڑے پیمانے پر پٹاخوں اور آتش بازی کا انتظام کرتے تھے۔ بچے محلے کی خواتین کے ساتھ آزاد میدان میں منعقد ہونے والی رام لیلا دیکھنے جایا کرتے تھے۔ تہوار کا یہ ماحول ہر کسی کو اپنی جانب کھینچتا تھا۔

ہمارے محترم والد حاجی جمال الدین ہمیں صرف کتابی تعلیم تک محدود نہیں رکھتے تھے بلکہ زندگی گزارنے اور لوگوں کے ساتھ مل جل کر رہنے کا سلیقہ بھی سکھاتے تھے۔ اتوار کے روز وہ ہمیں چوپاٹی اور آزاد میدان لے جایا کرتے تھے۔ وہاں وہ ہماری ملاقات اتر پردیش اور خصوصاً متھرا سے آئے ہوئے ان کاریگروں سے کراتے تھے جو دسہرے کے موقع پر راون کے بڑے بڑے پتلے اور آتش بازی کا سامان تیار کرتے تھے۔

متھرا ہمارے خاندان کا آبائی شہر ہے، اس لیے والد صاحب کی ان کاریگروں سے پرانی شناسائی تھی۔ وہ ہمیں ان کے کام اور محنت سے واقف کراتے اور بتاتے تھے کہ کس طرح وہ اپنی مہارت سے تہواروں کی رونق بڑھاتے ہیں۔ ان ملاقاتوں کے ذریعے ہم نے یہ سیکھا کہ ہر انسان کے کام کا احترام اور اس کی محنت کی قدر کرنا کتنا ضروری ہے۔ زندگی کی یہی چھوٹی چھوٹی تربیت انسان کو وسیع القلب بناتی ہے اور دوسروں کے دکھ درد اور خوشیوں کو سمجھنے کا حوصلہ دیتی ہے۔

والد صاحب کی دکان کررافورڈ مارکیٹ کے قریب منگل داس مارکیٹ کے سامنے واقع تھی۔ اس علاقے میں بڑی تعداد میں گجراتی تاجر کپڑے اور روزمرہ استعمال کی چھوٹی چھوٹی اشیا کا کاروبار کرتے تھے۔ اسکولوں میں دیوالی کی طویل تعطیلات ہوتیں تو ہم بھی اکثر دکان پر جایا کرتے تھے۔

دیوالی سے پہلے بازاروں کی رونق دیکھنے کے لائق ہوتی تھی۔ دکانوں پر خریداروں کا ہجوم رہتا اور ہر طرف تہوار کی تیاریاں نظر آتی تھیں۔ اسی دوران کاروباری تعلقات کے ساتھ ساتھ باہمی محبت اور اپنائیت کا اظہار بھی ہوتا تھا۔ ہندو تاجر محبت سے والد صاحب اور ہمیں مٹھائیوں کے عمدہ ڈبے اور دیگر تحائف پیش کرتے تھے۔

یہ تحائف محض کاروباری روایت کا حصہ نہیں تھے بلکہ برسوں سے قائم اعتماد، خلوص اور اپنائیت کی علامت تھے۔ کاروبار اپنی جگہ تھا، لیکن اس کے ساتھ انسانی رشتوں کی گرم جوشی بھی برقرار رہتی تھی۔ یہی وہ یادیں ہیں جو آج بھی ممبئی کے قدیم بازاروں اور وہاں کے لوگوں کی محبت کی یاد تازہ کردیتی ہیں۔

ممبئی میں یہ روایت آج بھی مختلف صورتوں میں نظر آتی ہے۔ جامع مسجد، جوہری بازار، شیخ میمن اسٹریٹ اور محمد علی روڈ جیسے علاقوں میں دیوالی کے موقع پر پٹاخوں، روشنیوں کی لڑیاں اور آرائش و زیبائش کے سامان کی دکانیں سج جاتی ہیں۔ ان بازاروں میں مسلمان اور خصوصاً بوہرہ برادری کے کئی تاجر بھی اس کاروبار سے وابستہ ہیں۔ دوسری جانب ہندو خریدار بھی بڑی تعداد میں ان بازاروں کا رخ کرتے اور خریداری کرتے ہیں۔

یہ منظر اس حقیقت کی عکاسی کرتا ہے کہ تہواروں کی خوشیاں اور بازاروں کی رونق کسی ایک برادری کی محنت سے نہیں بلکہ سب کے باہمی تعاون اور میل جول سے بڑھتی ہیں۔ دکاندار سامان فروخت کرتا ہے اور خریدار اپنی ضرورت کی چیزیں خریدتا ہے، لیکن اس لین دین کے ساتھ اعتماد، تعلق اور باہمی شناخت کے رشتے بھی مضبوط ہوتے ہیں۔

ممبئی جیسے بڑے اور کثیرالثقافتی شہر کی خوب صورتی یہی ہے کہ یہاں مختلف مذاہب اور برادریوں سے تعلق رکھنے والے لوگ روزمرہ زندگی میں ایک دوسرے سے جڑے رہتے ہیں۔ ان کے کاروبار، ضروریات اور خوشیاں ایک دوسرے سے وابستہ ہیں۔ یہی باہمی ربط و تعلق اس شہر کو ایک منفرد شناخت عطا کرتا ہے۔

گزشتہ چند برسوں کے دوران معاشرے میں ایسی آوازیں بھی سنائی دی ہیں جنہوں نے مذہب کے نام پر لوگوں کے درمیان فاصلے پیدا کرنے کی کوشش کی ہے۔ بعض اوقات چھوٹی چھوٹی باتوں کو بنیاد بناکر تنازعات کھڑے کیے جاتے ہیں اور سوشل میڈیا پر تلخی اور نفرت کو ہوا دی جاتی ہے۔ لیکن معاشرے کی اصل تصویر صرف ایسے واقعات سے تشکیل نہیں پاتی۔

آج بھی عام لوگ ایک دوسرے کے ساتھ کھڑے ہوتے ہیں۔ اپنے پڑوسیوں کے تہواروں کا احترام کرتے ہیں، ان کی خوشیوں میں شریک ہوتے ہیں اور ضرورت پڑنے پر مدد کے لیے آگے آتے ہیں۔ بازاروں میں مختلف برادریوں کے لوگوں کا مل کر کام کرنا اور تہواروں کے دوران ایک دوسرے سے جڑے رہنا اسی سماجی ہم آہنگی کی روشن مثال ہے۔

ایسی مثبت مثالوں کو سامنے لانا آج پہلے سے کہیں زیادہ ضروری ہے۔ معاشرے میں اعتماد اسی وقت مضبوط ہوگا جب ہم ان لوگوں اور تجربات کا ذکر کریں گے جو ہمیں ایک دوسرے سے جوڑتے ہیں۔ نفرت کی باتیں شاید تیزی سے پھیل جائیں، لیکن روزمرہ زندگی میں محبت، تعاون اور انسانیت کے رشتے بھی مسلسل مضبوط ہوتے رہتے ہیں۔

وقت کے ساتھ شہر کی صورت بدل گئی ہے۔ پرانی عمارتوں کی جگہ نئی عمارتیں تعمیر ہوگئی ہیں اور بازاروں کا نقشہ بھی تبدیل ہوچکا ہے۔ بہت سے پرانے شناسا اب اس دنیا میں نہیں رہے، لیکن ان کی محبت، خلوص اور اپنائیت کی یادیں آج بھی دلوں میں محفوظ ہیں۔

دیوالی کی جگمگاتی روشنیاں ہمیں ایک خوب صورت سبق دیتی ہیں۔ دیا خواہ کسی بھی گھر میں روشن ہو، اس کی روشنی آس پاس کے گھروں تک بھی پہنچتی ہے۔ خوشیاں بانٹنے سے کم نہیں ہوتیں بلکہ مزید بڑھ جاتی ہیں۔ یہی اصول خاندان، محلے، شہر اور پورے ملک پر بھی صادق آتا ہے۔

آج کی نئی نسل کو اپنی اس مشترکہ تہذیبی وراثت سے واقف کرانا ضروری ہے۔ اسے بتانا ہوگا کہ ہندوستان کی خوب صورتی اس کی مختلف شناختوں میں ہے اور اس کی اصل طاقت لوگوں کے درمیان قائم رشتوں اور باہمی اعتماد میں پوشیدہ ہے۔ سوشل میڈیا پر دکھائی دینے والی تلخی اور نفرت سے اوپر اٹھ کر ہمیں ایک دوسرے کے تہواروں کا احترام کرنا اور خوشیوں میں شریک ہونے کی روایت کو آگے بڑھانا چاہیے۔

آئیے، اس دیوالی پر ہم روشنی کے ساتھ ساتھ باہمی محبت، اعتماد اور بھائی چارے کا پیغام بھی عام کریں۔ اپنے آس پاس کے لوگوں سے تعلقات مضبوط بنائیں، ایک دوسرے کی خوشیوں میں شریک ہوں اور انسانیت کو ہر چیز پر مقدم رکھیں۔

کیونکہ جب تک محبت، رواداری اور بھائی چارے کے چراغ روشن رہیں گے، نفرت کے اندھیرے خود بہ خود کمزور پڑتے جائیں گے۔ یہی ہماری مشترکہ شناخت ہے، یہی ملک کے اتحاد کی اصل قوت ہے اور یہی آنے والی نسلوں کے لیے ایک بہتر ہندوستان کی تعمیر کا راستہ بھی ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ای میل: javedjamaluddin@gmail.com