بیدر۔ 30؍جنوری (محمدیوسف رحیم بیدری): سرحدی علاقے میں کنڑ زبان کی بیداری، ادبی اور ثقافتی پروگرام کے افتتاح کے موقع پر جمعرات کو بیدرتعلقہ کے یاقت پور گاؤں کے گورنمنٹ اردو ہائر پرائمری اسکول میں خطاب کرتے ہوئے کہاگیاکہ ہمارا بیدر ضلع ایک ایسا ضلع ہے جس کی متعدد سرحدیں ہیں، اور یہاں کے لوگ پانچ زبانیں بولتے ہیں۔ زمین اور قبیلے کی زبان کے طور پر کنڑ زبان سے محبت کر تے ہیں۔ سرحدی علاقوں کے سرکاری سکولوں میں پڑھنے والے طلباء کو اعلیٰ تعلیم اور اعلیٰ عہدوں کے لیے ریزرویشن کی ضرورت ہے۔مہمان خصوصی ادیب ڈاکٹر سبنا کرکنلی نے خطاب کرتے ہوئے کہا کہ تعلیم ترقی کی بنیاد ہے، اور تعلیم ہمارے تمام مسائل کو حل کرنے کی طاقت رکھتی ہے۔ کنڑ زبان کو تعلیم کی زبان، سونے کی زبان، اتحاد اور یکجہتی کی زبان بننا چاہیے۔ کپیندر ہوسمنی نے خطاب کیا اور کہا کہ کنڑ تحریریں کنڑ ادب اور ثقافت کی دولت کی علامت ہیں۔ انھوںنے حکومت پر زور دیا کہ وہ کلیان کرناٹک خطہ سے مصنفین کی کتابوں کو خریدے اور ان کی حوصلہ افزائی کرے۔اسکول کے ہیڈ ماسٹر جاوید احمد نے تقریب کی صدارت کی اور کہا کہ کنڑ کو روزمرہ کی کاروباری زبان بننا چاہیے اور حکومت کو سرحدی علاقوں میں واقع اسکولوں کو بنیادی سہولیات فراہم کرنے کے لیے کام کرنا چاہیے۔ گرام پنچایت ممبران مسز رتنما نرسپا گنپور، سنجیو کمار دلپتی، سید مدّے، اور ونائک چوہان نے بطور مہمان شرکت کی۔ ارچنا بسواشری نے ناڈگیت پیش کیا۔ طاہرہ اور مستقیم بیگم نے حب الوطنی کے گیت پیش کئے۔ پروگرام کا خیرمقدم دانش ایجوکیشن چیریٹیبل ٹرسٹ کے صدر غوثالدین نے کیا۔ شکریہ کے کلمات استاد کملاکر نے پیش کئے۔اس بات کی اطلاع باوثوق ذرائع سے ملی ہے۔
