ایوان ادب کا شاندار طرحی مشاعرہ

سلسلہ نمبر۔۔۔۔۔۔۔۔۔۔۔04

رپورٹ: ایاز بستوی

ممبرا (تھانہ، مہاراشٹر): ’’ایوان ادب‘‘ بمقام دینیات کلاسیس یاسمین پارک قادر پیلس کوسہ ممبرا ضلع تھانہ (ممبئی) کی چوتھی شعری محفل کا انعقاد بروز اتوار مورخہ ۵ نومبر ٢٠٢٣ء کو کیا گیا، پروگرام کی نظامت صدیق عمر نے کی، اورصدارت کے لئے محترم ایاز بستوی منتخب ہوئے۔ اس پروگرام میں مہمان اعزازی کی حیثیت سے ممبرا کے استاد شاعر محترم اعجازہندی شرف یاب ہوئے۔ پروگرام کے آغاز میں محترم اعجاز ہندی صاحب کی خدمت میں تنظیم ایوان ادب کی جانب سے تنظیم کے منتظم خاص محترم ذوالفقارصیدی نے منظوم سپاس نامہ پیش کیا، تلاوت قرآن کریم کے بعد مرحومین شعراء کرام اور بالخصوص شہدائے فلسطین اور مسجد اقصیٰ کی بازیابی کے لئے اجتماعی دعا کا اہتمام کیا گیا، اس کے بعد فخرعالم اعظمی اور یاسر اعظمی کے نعتیہ کلام سے باضابطہ پروگرام آغاز ہوا۔
مختصر تعارف کے ساتھ شعرائے کرام کے نمونۂ کلام پیش کئے جارہے ہیں:

مہمان اعزازی محترم اعجاز ہندی صاحب کا یہ نمائندہ شعر فلسطین کے حالات کی مکمل طور پر نبض شناسی کررہا ہے، معنوی اعتبار سے بھی شعر کو امتیازی شان حاصل ہے، شعر دیکھئے

جاں بازی وہمت کے فلسطینی سفر میں
صہیونی ارادوں کا مشن کانپ رہا ہے

اعجاز ہندی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فلسطین کے شہدا سے متعلق جناب صدر ایاز بستوی کا یہ شعر ایمانی جذبے سے کس قدر لبریز ہے اور کس طرح شہادت کی فضیلت کو اجاگر کرتا ہے محسوس کیجئے

زندہ ہیں حقیقت میں شہیدان فلسطین
کیا اب بھی انہیں فاضل جنت نہ کہیں گے

ایاز بستوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جو جپ رہے گی زبان خنجر لہو پکارے گا آستیں کا،، اس مصرعے کی مکمل ترجمانی اس شعر میں موجود ہے اور شہادت کی شہادت پیش کررہا ہے ،دیکھئے ذہن ودل میں گھر کرجانے والا یہ شعر

کب تک وہ چھپائیں گے مرے خون کے دھبے
کب تک وہ شہادت کو شہادت نہ کہیں گے

ذوالفقار صعیدی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عزم فاروق جب دل کی کیفیت کا مستحکم حصہ بن جائے تو شعر اس طرح سے وجود میں آتا ہے

آئے کوئی فاروق سا پھر آہنی پیکر
آئے کوئی القدس کا تن کانپ رہا ہے

ذوالفقارصعیدی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یہ حقیقت روز روشن کی طرح عیاں ہے کہ عزرائیل کی مقبوضہ سرزمین فلسطین کا ہی ایک حصہ ہے جو اہل فلسطین کے رحم وکرم پر آباد ہوا ہے ،اسی حقیقت کو جناب فخرعالم خان اعظمی نے اپنے دو مصرعوں میں کس طرح واضح کیا ،شعر دیکھئے

جو ظلم سے قابض ہیں فلسطین پہ لوگو!
ہم ان کی ریاست کو ریاست نہ کہیں گے

فخرعالم خان اعظمی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کمال احمد بلیاوی کا یہ شعر کمال کا ہے ،شاید یہ شعر آپ کی بھی تشنگی بجھا سکے

پڑجائے کسی دن نہ مری پیاس سے پالا
یہ سوچ کے دریا کا بدن کانپ رہا ہے

کمال احمد بلیاوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بادل بلیاوی کا یہ شعر وطن کی روداد سنا رہا ہے

ایسی ہوا چلی کہ وطن کانپ رہا ہے
شعلوں کی بارشوں سے گگن کانپ رہا ہے

بادل بلیاوی
۔۔۔۔۔۔۔۔۔۔۔۔۔۔۔۔۔۔۔۔

فطرت کی عکاسی اور کسی طبعی حالت اور کیفیت کو شعر میں موزوں کردینا یہ سلیم رشک صاحب کا مخصوص رنگ ہے اس حالیہ شعر میں جو حالات کی سچائی ہے اس سے گریز ممکن نہیں

سردار کی دستار لزتی ہے بھلا کیوں
کیا اس نے کیا ایسا غبن کانپ رہا ہے

سلیم رشک
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اشعار میں گفتگو کا انداز ،بے تکلف لہجہ،دلنشیں ہوجانے والا جذبہ، اور اشعار میں ایسی تہ داری جیسے آئینہ کے روبرو آئینہ یہ ساری خصوصیات اگر دیکھنی ہو تو مسیح الدین نذیری سے ملاقات کیجئے

گر مان بھی لوں حاکم دوراں میں تری بات
سمجھوتہ کہیں گے اسے بیعت نہ کہیں گے

مسیح الدین نذیری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ملحمہ کبری سے مراد وہ جنگ ہے جو مہدی علیہ السلام کی آمد سے قبل رونما ہوگی اسی جانب مومن ہندی صاحب کااشارہ ہے شعر دیکھئے

ہے ملحمہ کبری کی کڑی جنگ فلسطین
کم ظرف سعادت کو سعادت نہ کہیں گے

مومن ہندی
۔۔۔۔۔۔۔۔۔۔۔۔۔۔۔۔۔۔۔۔۔

توفیق فاخری صاحب کا یہ شعر ایمانی جذبے اور اسلام کی افادیت سے معمور ہے

معلوم نہیں تم کو کیا ایمان کی طاقت
اسلام کی آمد سے زمن کانپ رہا ہے

توفیق فاخری
۔۔۔۔۔۔۔۔۔۔۔۔۔۔۔۔۔۔۔۔۔۔

مقصود احمد، جمدا شاہی بستی یوپی جو کہ الریاض میں مقیم ہیں ان کا کلام فخر عالم اعظمی صاحب نے پیش کیا بہرحال یہ شعر دیکھئے کھوکھلے نعروں کی حقیقت کو کس طرح اجاگر کیا ہے

ہمت ہے تو کھل کر ذرا میدان میں آوٴ
نعروں کو فقط داد شجاعت نہ کہیں گے

مقصود احمد مقبول احمد
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ناظم مشاعرہ صدیق عمر صاحب کے اس مطلع میں ایک اہم پیغام ہے جو والدین سے متعلق ہے

ماں باپ کی خدمت کو جو نعمت نہ کہیں گے
ہم ان کا عمل باعث طاعت نہ کہیں گے

صدیق عمر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہنر رسولپوری صاحب کسی بات کو سہل انداز میں کہہ کر بڑی بات کہنے کا ہنر رکھتے ہیں شعر ملاحظہ کیجئے

تاریخ نہ لکھ دے کہیں مظلوم کا قاتل
یہ سوچ کے تیئس کا سن کانپ رہا ہے

ہنر رسولپوری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یہ شعر فلسطین کی حالیہ پس منظر کا ایک دریچہ ہے آپ بھی محسوس کیجئے

یہ کس نے ماں سے چھین لیا لخت جگر کو
اٹھتا ہے جنازہ تو کفن کانپ رہا ہے

شاہ فیصل مارولوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

خورشید عالم صابری کے مطلع میں خوف کی وہ تصویر ہے جو پورے عالم کی نگاہوں میں گردش کررہی ہے جس کے تصور سے لوگ حیران وششدر ہیں، مطلع حاضر ہے

کس خوف کی آمد ہے کہ من کانپ رہا ہے
من ایک طرف سارا بدن کانپ رہا ہے

خورشید عالم صابری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اصل روشنی بصیرت کی روشنی ہے جو انسان کی روح کو تجلی فراہم کرتی ہے یہ تجلی عبد ومعبود کے باہمی رشتے سے مربوط ہے جسے ضلالت کی تیرگی زائل کرنے سے قاصر ہے،دیکھئے جہانگیر عالم کا یہ شعر

دل جس سے منور نہ ہوا آپ کا صاحب
ہم ایسی عبادت کو عبادت نہ کہیں گے

جہانگیر عالم انصاری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بڑے سلیقے سے شعر میں طنزومزاح کا پہلو اجاگر کرنے والا شاعر جسے ہم شہرت ادیبی کے نام سے جانتے ہیں اسی قبیل کا یہ شعر قارئین کی نذر ہے

شہرت وہ مری پلکوں کے سائے میں ابھی ہیں
لیکن وہ کبھی بھی اسے اب چھت نہ کہیں گے

شہرت ادیبی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تابش رامپوری کی طوفان آشنا طبیعت جب کسی شعر سے وابستہ ہوتی ہے تو ایک مصرعے میں بادل کی گھن گرج اور دوسرے مصرعے میں بارود کا دھماکہ خود بخود پیدا ہوجاتا ہے۔ بہر حال یہ شعر حسب حال ہے۔ دیکھئے ہوش ربا شعر

بارود کی برسات سے رن کانپ رہا ہے
تیرا نہیں میرا بھی بدن کانپ رہا ہے

تابش رامپوری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آپ کا لہجہ پرلطف اور مزاح کا خفیف رنگ بھی شعر سے جھلکتا ہے حالات کی سچائی کو بڑی اجنبیت کے ساتھ بیان کرتے ہیں ملاحظہ کیجئے

ہے وقت قضا اور بدن کانپ رہا ہے
کیا ہوگا مرا ،سوچ کے من کانپ رہا ہے

رفیق چوگلے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اپنی حکمت عملی سے جذبات کو کھلونوں کی شکل دینے والا اور زمینی مسائل کا حل بتانے والا شاعر کمال فروخ آبادی کا یہ کمال دیکھئے

شاعر کمال آج فلسطیں کی زمیں پر
وہ خوف ہے کہ طرز سخن کانپ رہا ہے

کمال فروخ آبادی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عمل وہی قابل قبول ہے جو ریا ونمودکی قبیح حرکت سے پاک ہو اسی پہلو کو یاسر اعظمی نے اپنے شعر میں نمایاں کیا ہے ،دیکھئے

امداد بھی کرتا ہے تو دنیا کو دکھا کر
ہم ایسی سخاوت کو سخاوت نہیں کہتے

یاسر اعظمی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

زندگی قدرت کا ایک انمول تحفہ لہذا اس کی قدردانی لازمی ہے،کیا کہتے ہیں اس بارے میں نثار عارف

اتنی حسین زندگی پائی ہے آپ نے
رب کی طرف سے اس کو عنایت نہ کہیں گے

نثار عارف بھیونڈی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

احسان جتانا ایک قبیح وناپسندیدہ عمل ہے اسے سخاوت تعبیر کرنا خلاف عقل ہے دیکھئے اس بارے میں عبدالعظیم الہ آبادی کا نظریہ

مجبور کو دے کرکے جو احسان جتائے
ہم ایسی سخاوت کو سخاوت نہ کہیں گے

عبدالعظیم الہ آبادی

💠💠💠💠💠💠💠💠