ایوان ادب ممبرا کا ساتواں کامیاب مشاعرہ

رپورٹ. ایاز بستوی

ترجمان ایوان ادب.

ممبرا ممبئی: گزشتہ اتوار مورخہ 4 فروری کو ایوان ادب کا غیر طرحی مشاعرہ بہت ہی کامیاب رہا جس میں مقامی وبیرونی کم وبیش پچیس سے زائد شعراء کرام شامل حصہ لیا ،جس کی صدارت حکم چند اصغر کوٹھاری صاحب کے ذمہ رہی اور نظامت کا فریضہ مسعود حساس صاحب نے انجام دیا جبکہ ضمنی طور پر تابش رامپوری صاحب نے بھی نظامت کی کار کردگی آگے بڑھائی اور اس پروگرام کے اعزازی مہمان کے طور پر مسیح الدین نذیری صاحب منتخب کئے گئے اور مہمان خصوصی کی حیثیت سے منظر اعظمی صاحب کو مدعو کیا گیا، دوران مشاعرہ جناب صدر نے مہمانان اعزازی مسیح الدین نذیری کو ایوانِ ادب کی روایت کے مطابق منظوم سپاسنامہ پیش کیا بعد ازاں جناب اور مہمانان کی شال پوشی کی گئی اور یہ نمایاں کارکردگی اس بزم کا امتیازی وصف ہے، ایاز بستوی صاحب کی تلاوت اور ہنررسولپوری صاحب کی نعت کے بعد دوپہر تین بجے باضابطہ پروگرام کا آغاز ہوگیا اور مشاعرہ اس قدر پرشباب ہوا کہ مغرب کے بعد بھی بڑی آب وتاب کے ساتھ چلتا رہا ،مزید وضاحت کے لئے مشاعرے میں شامل شعرائے کرام کے نمائندہ اشعار پیش کئے جارہے ہیں:

مدت کے بعد لائی ہے تقدیر گھر مجھے

حیرت سے دیکھتے ہیں یہ دیوار ودر مجھے

صاحب صدر، حکم چند اصغر کوٹھاری

۔۔۔۔۔۔۔۔۔۔۔۔۔۔۔۔۔۔۔۔

دنیا کو دنیا کی راہوں کا خلل کھا جائے گا

اور جو باقی بچے گا الکحل کھا جائے گا

اعجاز ہندی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تمام سانپ تھے آب حیات نوشیدہ

تو ہاتھ کاٹ دئیے میں نے آستین کے ساتھ

ناظم مشاعرہ ،مسعود حساس

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

میں نے سب کچھ کہہ دیا اور تو نے بس اک ہوں کہا

اس کا مطلب میری بے تابی کا مطلب کچھ نہیں

صاحب اعزاز ، مسیح الدین نذیری

۔۔۔۔۔۔۔۔۔۔۔۔۔۔۔۔۔۔۔

جیتے جی میری نظر میں مر گیا وہ آدمی

بیچ دی دستار جس نے سر بچانے کے لئے

مہمان خصوصی ،منظر اعظمی

۔۔۔۔۔۔۔۔۔۔۔۔۔۔۔۔۔۔

وہ خلوتوں میں ہراک بات میری مانتے ہیں

تو بزم میں مجھے ان کی نہیں سے کیا لینا

سلیم رشک

۔۔۔۔۔۔۔۔۔۔۔۔۔۔۔۔۔۔۔

کمان کھینچئے پہلے تو آپ شانے تک

یہ تیر خود ہی چلا جائے گا نشانے تک

تجمل حسین زاہد

۔۔۔۔۔۔۔۔۔۔۔۔۔

رام کا مندر بنا اور سرکشی ہے بام پر

بھگت کرتے ہیں شرارت رام ہی کے نام پر

منتظم خاص ،ذوالفقار صعیدی

۔۔۔۔۔۔۔۔۔۔۔۔۔۔۔۔

اجازت ہو تو تیرا نام لکھوں

ابھی اس دل پہ کچھ لکھا نہیں ہے

نشتر مالکی

۔۔۔۔۔۔۔۔۔۔۔۔۔ ۔۔۔

جو راہ پر نہ آسکے جو حق طلب نظر نہ ہو

وہ کور چشم ہے یہاں وہ پاوٴں سے بھی لنگ ہے

ایاز بستوی

۔۔۔۔۔۔۔۔۔۔۔۔۔۔ ۔۔۔۔۔

محبت آگ ہے مت ہاتھ ڈالو

بہت مہنگی یہ نادانی پڑے گی

زید واقف بستوی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آج کیوں بیزار ہو مجھ سے بتاو کس لئے

مجھ سے ہی منسوب تھا کل تک تو افسانہ ترا

ازہر اعظمی

۔۔۔۔۔۔۔۔۔۔۔۔۔۔۔۔۔۔۔۔۔۔

بے مروت بے تکلف حق بیاں کرتا ہوں میں

آئینہ ہوں ٹوٹ کر بھی بے وفا ہوتا نہیں

مومن ہندی

۔۔۔۔۔۔۔۔۔۔۔۔۔۔۔۔۔۔۔۔.۔۔

چہرے پہ ترے حسن کی تنویر دیکھ کر

تصویر ہوگیا ہوں میں تصویر دیکھ کر

تابش رامپوری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اب بدلتے ہوئے حالات سے ڈر لگتا ہے

بات کرتے ہیں تو ہر بات سے ڈر لگتا ہے

فخر عالم اعظمی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کیوں پرکھتے ہو مجھ کو چہرے سے

مجھ کو چھوڑو ! مرا ہنر دیکھو

رفیق چوگلے

۔۔۔۔۔۔۔۔۔۔۔۔۔۔۔۔۔۔۔۔۔

محفلیں جس سے مہکتی ہیں گلابوں کی طرح

ایسے کردار کے عنبر ہیں نذیری صاحب

اسماعیل قمر بستوی

۔۔۔۔۔۔۔۔۔۔۔۔۔۔۔۔۔۔۔۔۔۔

کھلے ہیں اس لئے ہر وقت دل کے دروازے

وہ میرے شہر میں اک دن ٹھہرنے والا ہے

توفیق فاخری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بیوی ہو بد زبان تو گھبرانا مت جگاڑ

اس کی زبان پیار کی قینچی سے کاٹنا

جگاڑ دیوبندی

۔۔۔۔۔۔۔۔۔۔۔۔۔۔۔۔۔۔۔۔۔

تمہارے خوابوں ،خیالوں میں آنے جانے کا

مرے علاوہ کسی کو بھی اختیار نہ ہو

عارف عماد باندوی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کچھ ایسے لوگ ہیں جن کے لہو میں ہے شامل

کھلاو لاکھ شکر زہر اگلنے لگتے ہیں

منتظم رونق آبادی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایک مٹی کا میں کھلونا ہوں

تم کو رکھنا ہے مجھ کو اچھے سے

ہنر رسولپوری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گاوں سے بس اک لڑکی بھاگی، پر اس نے

کتنوں کا ہی لکھنا ، پڑھنا چھین لیا

توصیف کاتب

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غم کی بہتات سے پہلو میں اچھل جائے دل

عین ممکن کہ سینے سے نکل جائے دل

عمران عطائی

۔۔۔۔۔۔۔۔۔۔۔۔۔۔۔۔۔۔۔۔۔۔

زیست پرسکوں ہوگی

شوق مختصر رکھئے

روح اللہ منعمی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اک تو بے چہرگی اوپر سے میں آوارہ مزاج

مسئلے اور بھی بڑھ سکتے ہیں گھر جانے سے

بلال تیغی

۔۔۔۔۔۔۔۔۔۔۔۔.۔۔۔۔۔۔۔۔

جو تعصب کی زمانے کو غذا دیتے ہیں

نبض کو کاٹ کے جینے کی دعا دیتے ہیں

محمد احمد

۔۔۔۔۔۔۔۔۔۔۔۔.۔۔۔۔۔۔۔۔

خدا کے پاک گھر کعبہ کا میں بھی

کئی چکر لگانا چاہتا ہوں

ساحل بستوی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اخیر میں نشست کی کارکردگی پر روشنی ڈالتے ہوئے ذوالفقار صعیدی صاحب نے تمام مہمانوں اور شعرائے کرام کا شکریہ ادا کیا۔