بیدر۔ 14؍جنوری (محمدیوسف رحیم بیدری): شاعری آج ہماری زندگی کا حصہ بن چکی ہے۔ موجودہ دور میں نظمیں لکھنے والے شاعروں کی کثرت ہے۔ یہ ایک صحت مند علامت ہے کہ بیدر ضلع میں زیادہ نظمیں لکھنے والے لوگ ہیں۔ درحقیقت شاعری ثقافت کی جان ہوتی ہے ۔یہ بات ڈاکٹر نجلنگ رگٹے نے کہی۔ وہ شہربیدر کی دیوی کالونی میں واقع کالیکا دیوی مندر کے صحن میں دیش پانڈے لٹریری اینڈ کلچرل فاؤنڈیشن بیدر کے زیر اہتمام شاعری ، موسیقی تقریب اور مانیکیا وٹھل آڈیو ریلیز تقریب کے موقع پرخطاب کر رہے تھے۔ انہوں نے اپنی بات کو جاری رکھتے ہوئے کہا کہ شاعروں کو معاشرے کا مطالعہ کرنا چاہیے اور اس کا خیال رکھنا چاہیے۔ پروگرام کا افتتاح کرنے والے کملاکر وشواکرما نے کہا کہ شاعری ہو یا موسیقی، یہ تپسیا کی ایک شکل ہے۔ یہ مسلسل ریاض کے ذریعے حاصل کی جا سکتی ہے۔انہوں نے اپنے خیالات کا اظہار کرتے ہوئے کہا کہ فن زندگی کا لازمی جزو ہے۔ شاعر شری اومکارا پاٹل نے کہا کہ شاعری خدا کا تحفہ ہے، ہنر کے باوجود محنت سے لکھی گئی نظمیں لوگوں کے ذہنوں میں بسی رہتی ہیں۔ مہمان خصوصی پرنسپل اشوک بوڈیہال، مہیش پنچال، ڈاکٹر وشوناتھ اُپے، شیوراج کلاشیٹی، اور کرن کمار نے اپنے خیالات کا اظہار کیا۔ پوجی شری وشوانند گری مہاراج نے صدارت کی اور اپنا آشیرواد دیا اور کہا کہ روحانیت کو ہماری زندگی کا حصہ ہونا چاہیے۔ تنظیم کے چیئرمین ڈاکٹر۔ ایم۔ جی۔ دیش پانڈے نے شہ نشین سے اپنے تعارفی کلمات میں کہا کہ شاعری سے نہ صرف سماج کی عکاسی ہوتی ہے بلکہ دوسروں کے ذہنوں کو بھی کھولاجانا چاہیے،یہ شاعروں اور ادیبوں کی ذمہ داری ہے۔ اس دوران شعری محفل میں حصہ لینے والے شعراء میں آتمانند بمبلگی، دھن لکشمی پاٹل ہلسی، چندر شیکھر شندے، پاوترا کھڑکے، باپو بی مڈکی، روی داس کامبلے، سنگیتا کامبلے وغیرہ نے اپنی اپنی نظمیں سنائیں۔ ساتھ ہی ڈاکٹر ایم جی دیشپانڈے کے لکھے ہوئے گیت معروف گلوکار شیوکمار پنچال کے گائے ہوئے ‘مانکیا وٹھل’ کی آڈیو ریکارڈنگ کو قابل احترام ہاتھوں سے جاری کیا گیا۔ شیوکمار پنچال نے موسیقی اور گلوکاری فراہم کی۔ شیوانند نے پروگرام کا خیر مقدم کیا۔ محترمہ ودیاوتی نے پروگرام کی کمپیئرنگ کی۔ شری لکشمن آچاریہ نے دعائیہ گیت گایا۔ کماری مانسا پنچال نے استقبالیہ گیت پیش کیا۔ جے شری سلوچنا، آدتیہ پنچال، ممتا، لکشمی، پربھاوتی، شاردا، سوندریہ اور پوترا نے کورس میں گاناپیش کیا۔ شری ہنومنت رائے آچاریہ نے پروگرام کے لیے شکریہ کے کلمات پیش کئے۔ تقریب میں سینکڑوں معززین اور خواتین نے شرکت کی۔اس بات کی اطلاع ایک پریس نوٹ کے ذریعہ دی گئی ہے۔
