آقا ہی سے غلاموں کی پہچان ہے، دو جہاں کے دھنی تم پہ لاکھوں سلام
سہارنپور(احمد رضا): رسول اللہ حضرت محمد صلی اللہ علیہ وسلم کی تعلیمات اور کردار کل عالم کے لئے ایک لاثانی نظیر ہے ایک ایسی نظیر کہ جس نے پورے عالم میں وحدانیت اور دین اسلام کا با وقار انقلاب پیدا کر دیا ہے نتیجہ کے طور پر آج جوق در جوق پوری دنیا میں دین اسلام تیزی کے ساتھ پھل پھول رہا ہے جگہ جگہ اللہ تعالیٰ کی پاکی بیان کی جاتی ہے ساتھ ساتھ رسول اللہ کی عظمت کا بھی ذکر کیا جاتا ہے اصل میں دیکھا جائے تو یہ ہی حکمت خدا وند تعالی ہے! گزشتہ شب شہر سہارنپور کی فعال اور قابل احترام ادبی شخصیت حمید قریشی کی یاد میں تشکیل شدہ 50 سال سے مسلسل اردو زبان کی ترقی میں نمایاں کردار ادا کرنے والی تنظیم "تنظیم انجمن عروجِ ادب” کے زیرِ اہتمام شہر کے آنند نگر علاقہ میں واقع”حمید ہاؤس ” میں قابل احترام شعرائے سہارنپور نے ماہِ ربیع الاول کی مناسبت کے” رسولِ خدا باعثِ تخلیقِ کائنات حضرت محمد مصطفےٰ صل الله عليه وسلم” کی شان میں نذرانئہ عقیدت نعت و سلام کی شکل میں بڑی معیاری سطح پر پیش کیا اس نورانی محفل کی صدارت ڈاکٹر خالد بلال نے کی بطور مہمانِ خصوصی” ممبئی کے صاحبِ دیوان شاعر آفتاب اجمیری” کی شرکت اس تقریب میں توجہ کا مرکز رہی شہرت یافتہ شاعر با کمال حمید قریشی کے صاحبزادے انجمن کے جنرل سیکریٹری دانش کمال نے تقریب کی نظامت کرتے ہوئے والد ماجد حمید قریشی کی تحریر کردہ "حمد و نعت ” پڑھ کر اس نورانی محفل کا آغاز کیا نعت و سلام کی محفل کے بعد اختصار کے ساتھ ایک محفلٍ غزل کا بھی اہتمام کیا گیا جس کی صدارت جاوید خان سروہہ نے فرمائی اور نظامت کے فرائض خرم سلطان نے نبھائے اس موقع پر شہر سہارنپور کے معزز سامعین حضرات نے بھی شرکت کی جن شعراء کے کلام کو پسند کیا گیا انکا ایک ایک شعر نذرِ قارئین ہے:
آقا ہی سے غلاموں کی پہچان ہے
دو جہاں کے دھنی تم پہ لاکھوں سلام
آفتاب اجمیری
یہ شیشئہ دل ٹوٹ گیا ٹھیک ہے مگر
زخمی ہوئے یہ ہاتھ بھی کر چیں سمیٹ کر
دانش کمال سہارنپوری
لبوں پر ہر گھڑی میرے درودِ پاک رہتا ہے
مجھے غم ہی نہیں میرا بھنور میں گر سفینہ ہے
آصف شمسی
محترم مرتبہ مجھ کو حاصل ہوا
مصطفےٰ کے غلاموں میں شامل ہوا
خرم سلطان
ہزار کوشش کر لے کوئی زمانے میں
مجال ہے کہ رکوع و سجود رک جائے
عدیل تابش
گھر گھر ہو ذکرِ سیّد ابرار رات دن
ہوتی رہے گی بارشِ انوار رات دن
انور صابری
چلو منائیں ہم اس طرح آج جشن رسول
ہر ایک لب پہ مہکتے رہیں درود کے پھول
(دانش کمال)
تھم جا، نہ مثلِ شعلہ لپک،آگئے ہیں وہ
اے دل ذرا ادب سے دھڑک آگئے ہیں وہ
عاصم پیرزادہ
جلوؤں سے مشرف جو تیری دید نہیں ہے
عرفانِ خودی کاملِ توحید نہیں ہے
فیّاض ندیم
یہ عبادت نہیں ہے تو کیا ہے
دل میں ہے جو خیالِ محمد
ڈاکٹر الیاس عَلم
پروگرام ٹھیک بعد نماز عشاء شروع ہوکر دیر رات نہایت کامیابی کے ساتھ اختتام پر پہنچا۔ اس موقع پر انجمن کی جانب سے آفتاب اجمیری کو بدست دانش کمال، خالد بلال اور جاوید سروہہ شال پیش کرکے اعزاز سے سرفراز کیا گیا۔ پروگرام کے آخر میں پروگرام کنوینر دانش کمال نے مہمانانِ کرام کا شکریہ ادا کرتے ہوئے تقریب کے اختتام کا اعلان کیا۔
