بیدر۔ 09 ستمبر (محمدیوسف رحیم بیدری): میونسپل ایڈمنسٹریشن اور حج کے وزیر رحیم خان نے بارش سے متاثرہ مختلف علاقوں کا دورہ کیا اور لوگوں کے مسائل سنے۔ انہوں نے آج سیلاب سے متاثرہ علاقوں مالیگاؤں، کپلاپور (جے)، بیدر تعلقہ کے جامپاڈ کا دورہ کیا اور صورتحال کا جائزہ لیا۔ بعد ازاں گفتگو کرتے ہوئے انہوں نے کہا کہ شدید بارشوں کی وجہ سے کسانوں کے کھیتوں میں اگائی گئی فصلیں اڑد، سویابین، تور مکمل طور پر تباہ ہو گئی ہیں اور مختلف مقامات پر کئی مکانات، سڑکیں، پل منہدم ہو گئے ہیں۔ انہوں نے کہا کہ عہدیداروں کے ذریعہ ہر آفت اور نقصان کی اطلاع دینے اور کسانوں کو بروقت معاوضہ فراہم کرنے کے لئے ایک بین محکمہ جاتی سروے پہلے ہی شروع کیا گیا ہے۔ وزیراعلیٰ کو حلقے کی صورتحال سے آگاہ کرتے ہوئے مزید معاوضے کی درخواست کی گئی ہے۔ وزیر اعلیٰ سے 50 ہزار روپے فی ہیکٹر فراہم کرنے کی درخواست کی گئی ہے، جس کے لیے انہوں نے 20 ہزار روپے فراہم کرنے کا وعدہ کیا ہے اور وزیر اعلیٰ نے ایم ایل ایز کے حلقوں کی ترقی کے لیے 50 کروڑ روپے کی گرانٹ دی ہے۔ انہوں نے کہا کہ اس گرانٹ سے مختلف ترقیاتی کام کئے جائیں گے اور مالیگاؤں پل کو ترقی دی جائے گی۔ اس موقع پر بیدر اسسٹنٹ کمشنر محمد شکیل، بیدر تحصیلدار گریڈ-2 ضیاء الدین، تعلقہ پنچایت ای او مانیک راؤ پاٹل، محکمہ زراعت کی افسر آرتی پاٹل، پی ڈبلیو ڈی۔ اسسٹنٹ ایگزیکٹو انجینئر بھگونت سنگھ، باغبانی، محکمہ محصولات اور دیگر محکموں کے افسران موجود تھے۔
