بیدر۔ 19؍ جون(محمدیوسف رحیم بیدری): بیدرشہر کے نہرو اسٹیڈیم کے قریب واقع گرو نانک پبلک اسکول میں ماحولیات کا عالمی دن شاندار طریقے سے منایا گیا۔ پروگرام کا افتتاح پودے لگا کر کیا گیا۔ پروگرام کے مہمان خصوصی کی حیثیت سے خطاب کرتے ہوئے ہارٹیکلچر کالج بیدر کے ڈین ڈاکٹر ایس وی پاٹل نے کہا کہ انسانی لالچ کی وجہ سے ماحول اور آب و ہوا پر منفی اثرات مرتب ہورہے ہیں۔ پلاسٹک کا زیادہ استعمال ماحولیاتی تباہی کا باعث بنا ہواہے۔ انہوں نے کہا کہ آج کل ماحولیات کا خیال رکھنا ہر شہری کا فرض ہے۔ایک اور مہمان خصوصی بیدر ڈسٹرکٹ ہسپتال کے ڈسٹرکٹ سرجن ڈاکٹر احمد الدین نے کہا کہ والدین اپنے بچوں کو دیکھ کر بہت خوش ہوتے ہیں۔ اگر وہ اپنے بچوں کو مزید خوش اور صحت مند دیکھنا چاہتے ہیں تو انہیں ماحول، پانی اور آسمان کو صاف رکھنا چاہیے۔ وہ درخت لگا کر اچھا ماحول بنا سکتے ہیں۔گرو نانک پبلک اسکول کے 50 سال مکمل ہونے کے ایک حصے کے طور پر، گرو نانک ادارہ نے ایک ہزار پودے لگانے کا فیصلہ کیا ہے جس کا نعرہ ”ہماری ہریالی کی طرف” ہے، اور اسے گردوارہ کے گردونواح میں شروع کیا گیا ہے۔ 500 کے قریب طلباء اور اساتذہ نے شرکت کی۔اس موقع پر گرو نانک ایجوکیشنل انسٹی ٹیوشن کی نائب صدر ڈاکٹر ریشما کور نے پودا لگانے کو سبز انقلاب کے لیے ایک چھوٹی سی خدمت قرار دیا اورکہاکہ ہم سب کو صرف دکھاوے کے لیے نہیں بلکہ ہریالی کو بچانے اور بڑھانے کے لئے کام کرناچاہیے۔ طلباء کا ایک ہزار پودے لگانا قابل تعریف ہے۔ مکینیکل طرز زندگی کی وجہ سے گاڑیوں سے نکلنے والا دھواں ماحول کو متاثر کرتاہے جس کی وجہ سے انسانوں کا دم گھٹنے لگا ہے۔ انسان نے اپنی خود غرضی کے لیے درخت کاٹ کر ایسی تباہی برپا کی ہے۔ آنے والی نسل کو صاف ستھرے ماحول کے لیے جدوجہد کرنی پڑ سکتی ہے۔ انہوں نے کہا کہ اس کا واحد حل یہ ہے کہ لوگوں میں ماحولیات کے بارے میں بیداری پیدا کی جائے اور فی شخص ایک درخت، اورایک جنگل فی گاؤں کی پالیسی پر عمل کیا جائے، تب ہی آنے والی نسلیں زندہ رہ سکیں گی۔اس پروگرام میں شری نانک جھیراصاحب فاؤنڈیشن کے صدر ڈاکٹر ایس بلبیر سنگھ، سابق کرنل جی این ڈی کالج کے ایڈمنسٹریٹر آر ڈی سنگھ، آر ایف او جادھو، ڈی آر ایف او راٹھوڑ، گرو نانک تعلیمی ادارے کے پرنسپل ،پنیت سنگھ، پویت سنگھ اور طلبہ اس پروگرام میں موجود تھے۔اس بات کی اطلاع نلنی ڈی جی، پرنسپل گرو نانک پبلک سکول،بیدرنے دی ہے۔
