بارہ بنکی (ابوشحمہ انصاری): سعادت گنج کی ادبی تنظیم "بزمِ ایوانِ غزل” کے زیرِ اہتمام آئیڈیل انٹر کالج محمد پور باہوں سعادت گنج کے وسیع ہال میں طرحی نشست کا انعقاد ہوا اس عظیم الشان نشست کی صدارت کے فرائض بزرگ اور کہنہ مشق شاعر عاصی چوکھنڈوی نے انجام فرمائے اور نظامت کی ذمہ داری معروف شاعر اسلم سیدنپوری نے بحسن و خوبی نبھائی اور مہمانانِ خصوصی کے طور پر ظہیر رامپوری، دانش رامپوری اور شکیل آزاد صاحبان نے اپنی شرکت درج کرائی، نشست کا آغاز سحر ایوبی نے نعتِ نبئ اکرمﷺ سے کیا اس کے بعد دئے گئے مصرع طرح
"بچا ہے کوئی خریدار اب کہا میرا”
پر باقاعدہ طور پر طرحی نشست کی ابتداء ہوئی نشست بہت ہی زیادہ کامیاب رہی شعراء اور سامعین کے ذریعے بہت زیادہ پسند کئے جانے والے کچھ اشعار کا انتخاب نذرِ قارئین ہے ملاحظہ فرمائیں۔
جھلک دکھا کے میں پھر پردہء نہاں میں ہوں
سراغ پائیں گے اغیار اب کہاں میرا
عاصی چوکھنڈوی
تو کس طرح سے بنائے گا پرکشش اس کو
تری کہانی میں کردار اب کہاں میرا
ذکی طارق بارہ بنکوی
مکاں پہ کر کے سحر میں سفر پہ نکلا تھا
نہ جانے روزہ ہو افطار اب کہاں میرا
مائل چوکھنڈوی
ہر ایک لمحہ گزاروں گا اس کی چاہت میں
یہ وقت جائے گا بیکار اب کہاں میرا
اسلم سیدنپوری
مرے خلاف ہی لکھا ہے جس نے لکھا ہے
جہاں میں کوئی قلمکار اب کہاں میرا
ظہیر رامپوری
رہِ خدا میں فنا ہو کے اب بھی زندہ ہوں
رکے گا ذکر سرِ دار اب کہاں میرا
دانش رامپوری
جو بولتا ہے سو اس کی طرف سے بولتا ہے
بچا ہے کوئی طرفدار اب کہاں میرا
اثر سیدنپوری
میں اپنی گمشدہ ہستی کو ڈھونڈنے نکلا
کسی سے کوئی سروکار اب کہاں میرا
شکیل آزاد رامپوری
بہو نے چھین لیا مجھ سے میرے بیٹے کو
مرا ہی بیٹا رہا یار اب کہاں میرا
انور سیلانی
سنا ہے اور کسی کا یہ حق ہوا جاناں
ترا دلار ترا پیار اب کہاں میرا
مشتاق بزمی
وہ چل رہے ہیں مرے ساتھ ہمسفر بن کر
سفر حیات کا دشوار اب کہاں میرا
نازش بارہ بنکوی
خزاں نے چھین لی رنگت ہی سارے گلشن کی
وہ پہلے جیسا ہے گلزار اب کہاں میرا
سحر ایوبی
صدا لگائی ہے جا کر ہر اک محلے میں
رہا مزاج یہ خوددار اب کہاں میرا
راشد رفیق
خلوص آج دلوں سے نکل گیا کہہ کر
رہا ہے کوئی طلبگار اب کہاں میرا
دلکش چوکھنڈوی
ان شعراء کے علاوہ مصباح رحمانی، آفتاب جامی، ابو ذر انصاری، نعیم سکندر پوری، راشد چٹک چوکھنڈوی، اظہار حیات، صغیر قاسمی، طالب نور وغیرہ نے بھی اپنا اپنا طرحی کلام پیش کیا اور شعراء و سامعین سے خوب داد و تحسین حاصل کی سامعین میں سماجی خدمت گار ادب دوست حافظ محمد الیاس، سیٹھ ارشاد انصاری، ماسٹر محمد شعیب ( پرنسپل فیضان العلوم انٹر کالج ) ماسٹر محمد وسیم، ماسٹر محمد قسیم، ماسٹر محمد حلیم، ماسٹر محمد راشد انصاری اور محمد ندیم انصاری صاحبان کے نام بھی قابلِ ذکر ہیں۔
بزمِ ایوانِ غزل کا آئندہ سالانہ طرحی مسالمہ مورخہ 28/ جولائی بروز اتوار مندرجہ ذیل مصرع طرح پر ہوگا،
"نبی کا دین ہے روشن چراغِ حیدر سے”
حیدر:- قافیہ
سے:- ردیف
