ڈاکٹر واریؔ سنیل پنوار
تمہیں سارا زمانہ چاہیے تھا
یہ سب پہلے بتانا چاہیے تھا
بہت پہلے کے سارے فیصلے تھے
اسے بس اک بہانہ چاہیے تھا
سنا ہے شہر بھر سے تم خفا ہو
ہمیں بھی آزمانا چاہیے تھا
نئی باتوں میں بس اک یہ کمی تھی
انہیں لہجہ پرانا چاہیے تھا
تری آنکھیں بھلے ہی خشک رہتیں
کنارا بھیگ جانا چاہیے تھا
مجھے شدّت بڑھانی چاہیے تھی
تمہیں بھی مان جانا چاہیے تھا
بہت غمگیں ہیں اس میں لفظ واریؔ
غزل کو مسکرانا چاہیے تھا
