ایوان ادب کا ماہانہ عظیم الشان مشاعرہ

سلسلہ نمبر ۔۔۔۔۔۔۔۔۔۔۔05

رپورٹ . . ایاز بستوی

ممبئی (مہاراشٹر): مورخہ ٣ دسمبر ٢٠٢٣ء بروز اتوار دینیات کلاسس بمقام یاسمین پارک قادر پیلس کوسہ ممبرا میں ایوان ادب کی پانچویں ماہانہ شعری نشست منعقد ہوئی جس میں مقامی وبیرونی تقریبا بیس سے زائد شعراِِء کرام شامل رہے،اور پروگرام دوپہر تین بجے سے شام چھ بجے تک بڑی آب وتاب کے ساتھ چلتا رہا،اس پروگرام میں محترم مسیح الدین نذیری صاحب صدر کی حیثیت سے منتخب ہوئے اور محترم صدیق عمر صاحب نے نظامت کے فرائض انجام دِئے جبکہ اس مشاعرے کےصاحب اعزاز محترم سلیم رشک صاحب رہے ، پروگرام کی ابتداء تلاوت قرآن پاک سے ہوئی تلاوت کے بعد ایاز بستوی صاحب نے با ضابطہ اپنے نعتیہ کلام سے نشست کا آغاز کیا اس کے بعد صاحب اعزاز محترم سلیم رشک صاحب کی شخصیت اور ان کی شاعری کی افادیت پر استاد شاعر محترم اعجاز ہندی صاحب نے تفصیلی اور جامع مقالہ پیش کیا اسی کے کچھ وقفہ کے بعد صاحب اعزاز کو ناہید ثمر کاوش صاحب نے بھی منظوم عقیدت نامہ پیش کیا، ان رسومات کی ادائیگی کے بعد تاریخی منظوم سپاسنامہ جو پروگرام کے معمول میں شامل ہے جس کے محرر ذوالفقار صعیدی صاحب رہے انہی کے ہاتھوں صاحب اعزاز محترم سلیم رشک صاحب کو اعزاز بخشا گیا ،یہ بات بھی قابل ذکر ہے کہ اس منظوم سپاسنامے کو رواج دینے والے محترم مسعود حساس صاحب ہیں ، بہرحال رسم طغری کے بعد شال پوشی کا سلسلہ شروع ہوا اور فخر عالم خان اعظمی صاحب نے مہمان اعزازی جناب سلیم رشک کی شال پوشی کی اور ناگپور سے آئے مہمان محترم عمر علی انور صاحب کی ایاز بستوی صاحب نے شال پوشی کی پھر حسب معمول مشاعرہ اپنے شعری سفر پر گامزن ہوا ،آگے شعراء کرام کی وضاحت ان کے نمونہءکلام کے ساتھ کی جارہی ہے

جناب صدر، مسیح الدین نذیری صاحب کی علامتی اور رمزیہ شاعری کا جواب نہیں شاید اس شعر سے آپ بھی چہرہ شناسی کا ہنر سیکھ سکیں

کوئی جب ان کے پاس آئے سنے تب ان کو جانے

کہ یہ خاموش رہنے والے کتنا بولتے ہیں

مسیح الدین نذیری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

معروف شاعر اعجاز ہندی صاحب کا یہ شعر کوئی طلسم ہوش ربا نہیں بلکہ اسی زمین پر اپنے وجود کی بنیاد تعمیر کرتا ہے ،شعر دیکھئے

کسی طلسم کسی سحر کے اثر میں نہیں

مرا وجود کسی دسترس کے ڈر میں نہیں

اعجاز ہندی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کسی لہجے سے کسی سراغ تک پہونچ جانا یہ کسی اور کا نہیں بلکہ صاحب اعزاز سلیم رشک صاحب کا اپنا منفرد انداز ہے ،شعر ملاحظہ کیجِے

لگتا ہے جیسے ہو مری آواز ہو بہو

ائے خامشی بتا ترے لہجے میں کون ہے

سلیم رشک

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

خورشید عالم صابری صاحب نے عشق کا تعارف بڑے خوبصورت انداز میں کرایا ہے آپ بھی محسوس کیجِے

عشق کی ابتدا قیامت ہے

کون جانے کہ انتہا کیا ہے

خورشید عالم صابری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

حکم چند اصغر صاحب علالت کے سبب پروگرام میں حاضر نہیں ہوسکے تھے البتہ ان کا کلام فخر عالم خان اعظمی صاحب نے پیش کیا حکم چند صاحب کا یہ شعر حالات کی نبض شناسی کررہا ہے

جب رفتہ رفتہ بن گیا ناسور ائے طبیب

تب جاکے میرے زخم کا درماں ہوا تو کیا

حکم چند اصغر کوٹھاری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بزم کے منتظم محترم ذوالفقار صعیدی صاحب نے اس شعر میں اجتماعی طور پر ایماندار تاجر کا جذبہ اور رجحان پیش کیا ہے ،اس شعر سے آپ نے کیا محسوس کیا

تاجروں نے احتجاجاً مجھ سے آکر یہ کہا

سچ کے تاجر ہو تو نکلو جھوٹ کے بازار میں

ذوالفقار صعیدی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

انسان سمجھتا ہے کہ میں نے چہرے پر دل کی عبارت پڑھ لیا ہے جبکہ چہرے پر بھی چہرہ ہوتا ہے، لیکن نگاہوں سے جو کچھ اجاگر ہوتا ہے حقیقت میں وہ دل کی کیفیت ہوتی ہے ۔ چلئے شعر سے روبرو ہوتے ہیں

چہرے کو نہیں میں نے نگاہوں کو پڑھا ہے

یہ درد ہے دل کا کوئی افسانہ نہیں ہے

ایاز بستوی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فخر عالم خان اعظمی صاحب کی شاعری میں تصوف ومعرفت کے اثرات بھر پور انداز میں پائے جاتے ہیں ،بالخصوص یہ شعر دیکھئے کہ عالم فانی اور عالم بقا سے کس طرح مربوط ہے

دنیا کی لذتوں سے جو بچ کر نکل گئے

پرکیف آخرت کا سفر دیکھتے رہے

فخرعالم خان اعظمی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عمر علی انور صاحب کے اس شعر سے ماں کے تعلق سے جذبہٴپیاروشفقت کا کیا نفسیاتی پہلو اجاگر ہوتا ہے ،دیکھئے بولتا ہوا شعر

*کب رکھے بچوں کی خاطر سخت لہجہ دیر تک*

*ماں کی آنکھوں میں کہاں رہتا ہے غصہ دیر تک*

*عمر علی انور (ناگپور)*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

شہرت ادیبی کے اس شعر میں نوجوان نسلوں کے لئے ایک اہم پیغام پوشیدہ ہے ، آپ بھی محسوس کیجئے

*لگا دیں گے قسم اللہ کی وہ آگ پانی میں*

*جنہوں نے نفس امارہ کو مارا ہے جوانی میں*

*شہرت ادیبی (بھیونڈی)*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ناظم مشاعرہ صدیق عمر صاحب نے اس بات کو بزبان شعر ثابت کیا ہے کہ ظالم اپنی موت خود مرجاتا ہے شعر ملاحظہ ہو

*گرا ہوا ہے وہ ظالم اسے گرانا کیا*

*بڑھاوں ہاتھ بھی کیسے گلے لگانا کیا*

*صدیق عمر (میراروڈ)*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جناب تابش رام پوری کے اس شعر میں جو تغزل کا رنگ ہے وہ انتہائی گہرا اور لہجہ بھی بہت منفرد ہے ،لیجئے شعر حاضر ہے

*جو ترا رند ہے کب جام لیا کرتا ہے*

*اک نظر دیکھ کے دل تھام لیا کرتا ہے*

*تابش رام پوری*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایمانی جذبے سے لبریز فیصل مارولوی صاحب کا یہ شعر واقعی قابل تحسین ہے

*مثل خلیل آج بھی ایمان چاہئیے*

*باطل کو جو ہلادے وہ طوفان چاہئے*

*شاہ فیصل مارولوی( ساکی ناکہ)*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غربت میں اگر صبر کا جذبہ ہو تو یہ خدا کی نظر میں انتہائی پسندیدہ عمل ہے، اسی جذبے کی پاداش میں توکل اور خودداری کا جذبہ خود بخود پیدا ہوجاتا ہے ،شعر دیکھئے

*صبر، قناعت ، شکر، توکل ،خودداری*

*غربت میں بھی کیا کیا کرنے والے لوگ*

*توفیق فاخری*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مطلوب ٹانڈوی صاحب نے اپنے اس شعر میں شہادت کی اہمیت کے ساتھ شہادت کا جذبہ پیش کیا ہے، شعر ملاحظہ کیجئے

*راہ حق میں جو فنا ہوتے ہیں وہ مرتے نہیں*

*اپنے قرآن میں یہ رب نے بتا رکھا ہے*

*مطلوب ٹانڈوی*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مومن ہندی صاحب نے ایک شاہکار نظم بابری مسجد کی برسی سے متعلق پیش کی تھی جس کا ایک پسندیدہ بند قارئین کی خدمت میں حاضر ہے

*سنو اے مومنو! مسجد تمہیں آواز دیتی ہے*

*مسلماں کو مسلماں ہونے کا اعزاز دیتی ہے*

*یہی ہر دور میں شاہیں صفت جانباز دیتی ہے*

*یہی ٹوٹے پروں کو طاقتِ پرواز دیتی ہے*

*کہیں تم بھول نا جانا خدا کا گھر بسانا ہے*

*اگرچہ خار ہیں ہر سو، قدم آگے بڑھانا ہے*

*آصف مومن ہندی*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اگر ایک انسان کسی کی نگاہ میں اچھا ہوتا ہے تو کسی کی نگاہ میں برا بھی ہوتا ہے یہی دستور دنیا ہے ،دیکھئے اس خیال کو رفیق چوگلے صاحب نے کس طرح باندھا ہے

*ایسا نہیں کہ سب ہی مرے معترف رہے*

*کچھ لوگ عادتا بھی مخالف رہے مرے*

*رفیق چوگلے*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دنیا بہت خود غرض ہے اس بات کو روح اللہ منعمی نے کس طرح نبھایا ہے شعر دیکھئے

*بے مطلب کون ہوتا ہے کسی کا*

*تو کیوں ہمدرد ہوتا جارہا ہے*

*روح اللہ منعمی*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

زاہد انصاری صاحب کی یہ فکر حسب حال ہے ،دیکھئے کمال کا شعر ہے

*وہ اگر چھین رہے ہیں تو یہ حق ہے ان کا*

*ہم اگر مانگ بھی لیں گے تو بغاوت ہوگی*

*زاہد انصاری*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یہ بھی حالات آشنا شعر ہے دیکھئے عارف عماد صاحب نے کس جذبے سے کہا ہے

*جب گرم ظلم وجبر کے بازار ہوگئے*

*تبدیل سرخیوں میں سب اخبار ہوگئے*

*عارف عماد باندوی (گھاٹکوپر)*

۔۔۔۔۔۔۔۔۔۔۔۔…۔۔۔۔۔۔۔۔

مقصود احمد مقبول احمد صاحب کی غزل فخر عالم اعظمی صاحب نے پیش کی ،اس غزل کا یہ شعر دیکھئے کیا نگاہ عارفانہ ہے

*پردہ پوشی ،عفو کا برتاو ہو*

*جب مرے اعمال کا دفتر کھلے*

*مقصود احمد مقبول احمد (الریاض)*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یاسر اعظمی صاحب کا یہ شعر دیکھئے کس سلیقے سے کہا ہے شعر میں رنگ تغزل بھی پنہاں ہے

*دل لگانا مت کسی سے تم بھی یاسر اعظمی*

*ٹوٹ کر چاہو گے جس کو بے وفا ہوجائے گا*

*یاسر اعظمی*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کاوش ثمر صاحب نے اردو سے متعلق کیا خوبصورت شعر کہا ہے

*فضا میں چار سو خوشبو بکھر گئی ہے ثمر*

*علم اٹھائے یہ اردو کا کون آتا ہے*

*کاوش ثمر جگاڑ دیوبندی*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

محمد علی دربھنگوی صاحب بے تحاشہ حسن کا راگ الاپتے ہوئے نظر آتے ہیں شعر دیکھئے

*تمہیں جب دیکھتا ہوں بس یہی محسوس کرتا ہوں*

*بہت پیارا مرا محبوب ہے ان چاند،تاروں سے*

*محمد علی دربھنگوی*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کیا نازک پیرایہ ہے دیکھئے جہانگیر عالم کا یہ شعر

*جلاتے شوق سے گلدان لیکن*

*تمہیں تتلی اڑانی چاہئیے تھی*

*جہانگیر عالم*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عبدالعظیم الہ آبادی کے اس شعر وحدانیت کا تصور موجود ہے شعر ملاحظہ کیجئے

*مانگو گے جو خدا سے تمہیں دے گا وہ عظیم*

*اس کو ملے گا کیا جو کبھی مانگتا نہیں*

*عبدالعظیم الہ آبادی*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایک روایت کا مفہوم ہے کہ جب تمہاری نظر امیروں پر ہوگی تو تم خدا کی ناشکری کروگے اور جب غریبوں اور اپنے چھوٹوں پر غور کروگے تو تم خدا کا شکر ادا کروگے ،کسی حد تک اسی مفہوم سے وابستہ فکر منتظم رونق آبادی نے پیش کی ہے شعر ملاحظہ کیجِے

*روبرو ہوں جو سبھی چھوٹے تو چھوٹا رہنا*

*کتنا مشکل ہے سمندر ہو کے دریا رہنا*

*منتظم رونق آبادی*

. . ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پروگرام کے اخیر میں بزم کے منتظم محترم ذوالفقار صعیدی صاحب نے تمام شعرائے کرام اور سامعین کا شکریہ ادا کیا۔